Gjatë një fjalimi në Capitol Hill në mbështetje të “DEFIANCE Act”, Paris Hilton rikujtoi shpërndarjen e videos së saj intime vite më parë.
Ky projektligj u jep mundësinë personave, imazhi i të cilëve është shfrytëzuar për të krijuar video e imazhe pornografike përmes Inteligjencës Artificiale, të ndërmarrin veprime ligjore kundër krijuesve dhe shpërndarësve të përmbajtjeve.
“Kur isha 19 vjeçe, një video private dhe intime e imja u shpërnda në mbarë botën pa pëlqimin tim. Njerëzit e quajtën skandal. Nuk ishte. Ishte abuzim. Në atë kohë nuk kishte ligje që të më mbronin. Nuk kishte as fjalë për të përshkruar atë që më ishte bërë. Interneti sapo kishte nisur të përhapej dhe po ashtu edhe ligësia që erdhi bashkë me të.”
Siç edhe u shpreh, gjithë vëmendja gjatë asaj kohe ishte mbi të dhe ofendimet që mori nuk kishin fund.
“Çfarë nuk më thanë. Qeshnin me mua dhe më bënin objekt talljeje. E shitën dhimbjen time për klikime dhe më pas më thanë të heshtja, të vazhdoja jetën, madje të isha mirënjohëse për vëmendjen që kisha marrë. Ata nuk më panë si një grua të re që ishte shfrytëzuar. Nuk panë panikun që ndjeva, turpin apo poshtërimin. Askush nuk më pyeti çfarë humba. Humba kontrollin mbi trupin tim, mbi reputacionin tim. Më vodhën vlerësimin që kisha për veten.”
Kjo nuk është hera e parë që ajo flet mbi videon erotike që u shpërnda vite më parë.
Disa javë pasi Paris Hilton nisi të përjetonte famën falë reality show-t “The Simple Life”, u publikua videoja e saj intime me të dashurin e asaj kohe, Rick Salomon.
Në vitin 2003, Hilton ishte vetëm 19 vjeç kur u gjend papritur në qendër të vëmendjes publike.
