Padia prej 400 milionë dollarësh që Justin Baldoni kishte ngritur kundër Blake Lively dhe Ryan Reynolds është rrëzuar. Sipas dokumenteve të siguruara nga revista PEOPLE, gjykatësi amerikan, Lewis Liman, nënshkroi një urdhër të ri të premten, më 31 tetor, duke theksuar se Baldoni dhe partnerët e tij në Wayfarer Studios kishin humbur afatin për të ndjekur pretendimet e tyre, pasi çështja ishte rrëzuar fillimisht në qershorin e kaluar.
Gjykatësi i kishte njoftuar të gjitha palët më 17 tetor se kishte ndërmend të jepte një vendim përfundimtar. Vetëm Blake Lively iu përgjigj, duke kërkuar që vendimi të finalizohej, por me kusht që shpenzimet ligjore të mbeteshin në fuqi, kërkesë që gjykatësi e pranoi.
Ky vendim shënon kapitullin më të fundit në një betejë ligjore që nisi në dhjetor, kur Blake Lively paditi Justin Baldonin për sjellje të papërshtatshme gjatë xhirimeve të filmit It Ends with Us dhe për një fushatë shpifjesh, akuza që aktori i ka mohuar. Padia fillestare e Lively-t mbetet ende e hapur.
Justin Baldoni loses $400M lawsuit against Blake Lively after missing court deadline. Read more: https://t.co/7bc1KZchnH pic.twitter.com/cV3s9hZvMC
— Complex (@Complex) November 1, 2025
Kundërpadia e Baldonit, që kërkonte 400 milionë dollarë dëmshpërblim nga Lively, bashkëshorti i saj Ryan Reynolds dhe publicisti i tyre, u rrëzua, ashtu si edhe një padi e veçantë prej 250 milionë dollarësh që ai kishte ngritur kundër New York Times.
Pas vendimit të gjykatës, Blake Lively reagoi në Instagram Stories, duke shkruar:
“Ashtu si shumë gra të tjera, kam ndjerë dhimbjen e një padie hakmarrëse dhe turpin e sajuar që ajo përpiqet të na shkaktojë. Edhe pse padia kundër meje u rrëzua, shumë gra nuk kanë burimet për të luftuar.”
Aktorja shtoi se tani është “më e vendosur se kurrë të mbroj të drejtën e çdo gruaje për të mbrojtur veten, sigurinë, dinjitetin dhe historinë e saj.”
Avokatët e Blake Lively, Esra Hudson dhe Mike Gottlieb, e përshkruan vendimin si “një fitore të plotë” për klienten e tyre, duke theksuar se “që në fillim ishte e qartë se ‘padia prej 400 milionë dollarësh’ ishte e pabazë, dhe Gjykata e konfirmoi këtë.”
Nga ana tjetër, avokati i Justin Baldonit, Bryan Freedman, e cilësoi reagimin e Lively-t dhe ekipit të saj si “njoftim të rremë për një fitore të parashikueshme”, duke pretenduar se çështja përfshin “akuza të pavërteta për ngacmim seksual dhe një fushatë shpifjeje që nuk ka ekzistuar kurrë.”
