Herët në mëngjes, Aurela Gaçe thumboi publikisht njerëzit që sipas saj “mburren me rrobat firmato”. “Të mburresh me rroba firmato, është varfëri shpirtërore,” shkroi ndër të tjera këngëtarja.
Ndonëse Aurela nuk e prek pjesën e çmimit të veshjeve të shtrenjta, fillimisht është e nevojshme të sqarojmë që “veshje e shtrenjtë” quhet çdo veshje që buxheti im, i yti dhe i kujtdo tjetër nuk e përballon. Gjërat në këtë pikë janë relative. Nëse për dikë është absurde të blesh një fustan dasme që kushton 5,000 euro, i cili do të vishet vetëm NJË herë në jetë, për dikë tjetër nuk është.
“[...] por këta që nxjerrin akoma në pah firmat e rrobave më duket se akoma nuk dinë të gëzojnë plotësisht edhe paranë që me “mund” kanë mbledhur,” shkruan në një pjesë Gaçe. Në këtë pikë, lind pyetja: Kush këta?
Përgjithësimi është i gabuar. Për shembull, një bloger që ka lidhje me modën e ka të detyruar të postojë veshje firmato, luksoze ose marka të ndryshme. Njerëzit e ndjekin pikërisht për këtë gjë: Duan të dinë nëse atletet janë Gucci, Alexander McQueen, Versace, Zara, Waikiki etj? Nuk duhet të harrojmë që së fundmi po rritet gjithnjë e më tepër trendi i logove.
Të qenurit influencer, të kesh ndikim mbi një fushë të caktuar, ka një strategji: TË POSTOSH PËR...! Pra, blogerë si Lori Hoxha, Armina Mevlani, Estela Ujka etj detyrimisht do të postojnë veshje firmato për aq kohë sa njerëzit i ndjekin pikërisht për modën. Hera-herës edhe për udhëtimet.
“Vetëm se fakti që e tregon më bën të qesh,” shkruan këngëtarja në vijim. Ok, është e lehtë “të gjykosh” diçka që nuk e kupton. Për shembull, për shumë njerëz është palestra. “Pse duhet të rraskapitem në palestër, kur ushqimi është një ndër dashuritë më të mëdha në jetë,” mund të thotë dikush. Jo domosdoshmërisht zgjedhja për të mos shkuar në palestër është e duhura, por është jeta e tyre, ndaj mund të bëjnë ç’të duan.
Më pas, këngëtarja vazhdon me “Mendoja se kishte rënë pak fluksi i pordhacëve bosh të këtij fshatit tonë madhështor ku paradën e bëjnë pikërisht ata që dje mbase edhe buka u mungonte (kjo është pikërisht edhe arsyeja që sot e tregojnë),” a thua se kushdo që ka qenë i varfër, nuk ka të drejtë të postojë veshje të shtrenjta.
"Ta gëzojnë, vetëm të mos harrojnë fasulet. T’i ziejnë e ta derdhin ujin e parë, se përndryshe do t’u grisen brekët nga pordhët," shton ajo në fund. Për të mos e lënë pa përmendur: Të rritur në komunizëm, ku të gjithë ishin të barabartë, duket se shqiparët kanë një lloj paragjykimi ndaj kujtdo që është i suksesshëm. Sigurisht që ka edhe njerëz që janë bërë të suksesshëm në qindra mënyra, por nga ana tjetër ka edhe të tjerë që me mund e djersë ia kanë dalë dhe sot s’është e drejtë që vazhdon e përmendet tenxherja e fasuleve apo dushi me vajgur.
“Ka shumë të pasur që kurrë nuk e mësuam se çfarë veshin, çfarë hanë,” shkruan ndër të tjera Aurela, a thua se nëse vishesh shtrenjtë, duhet me patjetër të dish se ç’po vesh. Shumë njerëz të pasur zgjedhin produkte të shtrenjta, gjykuar nga ngjyra, materiali, dizajni, sa të rehatshme janë, pa qenë nevoja të dinë nëse janë ose jo koleksioni i fundit, nëse janë ose jo në modë etj.
Njerëzit kujdesen që përmes veshjeve të tregojnë mbi statusin e tyre dhe fundja pse jo. Asnjëra palë nuk është gabim. Disa mjaftohen duke qenë rehat me veshjet e tyre luksoze, pa qenë nevoja t’i ekspozojnë në Instagram. Disa të tjerë janë të mendimit se “askush nuk ble një Lamborghini për ta mbajtur në garazh”.
