Shumë nga ju mund ta kenë njohur The Weeknd nga kolona zanore hit e “50 Shades of Grey”, “Earned it” ose nga bashkëpunimi i famshëm me Ariana Grande, “Love me harder”. Por të paktë janë ata që e dinë se Abel Tesfaye, i njohur me emrin e skenës si The Weeknd pa “e”, ka rreth 30 këngë, pa llogaritur dhjetra të tjera të prodhuara në hapat e parë të karrierës së tij, të cilat i postonte në Facebook dhe YouTube me imazhe femrash të bukura. “E urreja si dukesha në foto,” ka thënë ai më pas duke shpjeguar anonimitetin që e karakterizonte personazhin e tij.
Vetëm 5 vite më parë, ai punonte në një dyqan outlet të American Apparel. Që në hapat e parë të karrierës, ai nuk pranonte të jepte intervista (që edhe sot janë të rralla), nuk bënte koncerte dhe e shpërndante muzikën e tij falas. Ndërkohë këtë muaj, me publikimin e albumit të tij të ri dhe hitit “I can’t feel my face”, siç shkruan "The Guardian", ai po humb pothuajse çdo grimcë anonimiteti duke u katapultuar fuqishëm në majat e industrisë muzikore.
I pyetur për emrin e tij skenik, 25-vjeçari ka rrëfyer se është larguar nga shtëpia në moshën 17-vjeçare sëbashku me shokët e tij. Aventura supozohej të zgjaste vetëm një fundjavë por ata nuk u kthyen më në shtëpitë e tyre dhe nga këtu, Abel, me origjinë etiopiane, mori spunton për emrin e tij skenik. Ai tregon se iu desh të hiqte një “e” për shkak se një tjetër grup rroku mbante këtë emër.
Me “përrallat e tij të errëta për drogën dhe seksin” sipas “The Guardian”, The Weeknd mund të jetë fytyra e re e R&B-së. Ai nisi të bëhej i njohur me triologjinë “House of Ballons”, “Thursday” dhe “Echoes of Silence”. Por fansat e vjetër të The Weeknd duket se nuk e kanë pritur shumë mirë ngjitjen e tij drejt famës duke e akuzuar se është kthyer në një artist komercial. Kënga e tij e re “I can’t feel my face” tashmë renditet në vend të dytë në klasifikimin e Billboard Hot 100 dhe The Weeknd mesa duket ka premisa të jetë Michael Jackson i ri i kësaj gjenerate.
