Sërish, thuhet se Ermal Mamaqi do të largohet nga Tv Klan. Së fundmi, burime për Newsbomb.al u shprehën se “Mamaqi nuk do të jetë më pjesë e Tv Klan”. Sipas po të njëjtave burime, e shtuna do t’i besohet spektaklit të humorit, Duplex, i cili do të moderohet nga Marina Vjollca dhe do të vijë me ndryshime.

Anabel u përpoq të kontaktonte me Albert Dumanin, drejtorin e programacionit në Tv Klan, por nuk pati një përgjigje nga ana e tij.

Në mesin e qershorit, u përfol fillimisht se pas tri vitesh bashkëpunim, kontrata e “Xing me Ermalin” me Tv Klan nuk do të rinovohej. Burime për Indexonline.net u shprehën se Ermal Mamaqi do të largohet drejt Top Channel.

I ftuar në emisionin “Treshat”, Mamaqi u pyet nëse “’Xing me Ermalin’ do të vazhdojë sezonin e ardhshëm”.

“Do të vazhdojë patjetër, besoj” u përgjigj ai. “Do të vazhdojë në Klan?”, e pyeti sërish Bora Zemani. “Po, besoj, patjetër në Klan,” shtoi ai.

Fjalë si “besoj” dhe “patjetër” duket sikur kundërshtojnë njëra-tjetrën, ndaj Zemani kërkoi të tjera detaje për sezonin e ardhshëm televiziv: “Do të thotë se mund të jetë edhe një gjë tjetër?”.

“Po, mund të jetë dhe një gjë tjetër,” përfundoi Mamaqi.