Pas një pjese të parë që tronditi me parashikimet e vdekjes së babait dhe gjyshes, Zana Paradise Gjergji foli në “The Dalina Show” për një kapitull edhe më të pazakontë. Nga San Diego, Kaliforni, ajo rrëfeu një seri përvojash shpirtërore që shkojnë përtej çdo logjike tokësore, nga engjëjt dhe nivelet e ndërgjegjes, deri te një udhëtim në Hënë ku thotë se ka takuar një alien.
Në qendër të rrëfimit të saj qëndron përvoja transformuese e vitit 1995. Ishte një moment i brishtë pas ndarjes nga bashkëshorti dhe përballjes me një sëmundje gripale, kur Zana thotë se u përball për herë të parë me një entitet të dritës.
“Një shkop dirigjenti u shndërrua papritur në një engjëll mashkull me energji diellore, në ngjyrë të bardhë, serm. Ai më tha të përqendrohem tek ‘Koshienca 43’ për të zbuluar kush është Zoti.”
Ajo e përshkruan këtë kontakt si një ndjesi të fuqishme dashurie dhe dritësie:
“Ndjeva se engjëjt ekzistojnë. Zoti më do. Në botën e shpirtit, Ai është një diell.”
Sipas Zanës, Koshienca 43 është niveli më i lartë i vetëdijes, një lloj “boshti shpirtëror” ku fshihet kodi hyjnor:
“Nëse punon me të, kthehesh në engjëll dhe fiton jetën e pavdekshme.”
Ajo e ka ndjekur këtë rrugëtim përmes trajnimeve në Monroe Institute, një qendër kërkimore për përvojat jashtë trupit, ku ka marrë pjesë 20 herë me një kosto prej 2.500 dollarësh për klasë, pra një investim serioz. Aty, Zana tha se ka marrë pjesë në eksperimente të kontrolluara që përfshinin ndezjen e një poçi me mendje apo lëvizjen e akrepëve në kuti të mbyllura.
Zana foli gjithashtu për përvojat jashtë trupit (OBE – Out of Body Experience), të cilat i ka përjetuar me një qartësi që sipas saj i dha mundësinë të shohë përtej kësaj bote:
“Qetësohesh, ngre shpirtin, e nxjerr nga trupi, e lë pezull. Trupi shpirtëror shkon në një diell të madh, ku mblidhemi të gjithë.”
Por ndoshta pjesa më befasuese e rrëfimit ishte ajo që lidhej me udhëtimin shpirtëror në Hënë.
“Bëra 7-8 frymëmarrje, u ngrita. Hëna më tha ‘S’jam planet, jam anije.’ Pashë një alien, një frikë e tmerrshme.”
Zana pretendon se në Hënë jetojnë rreth 25.000 alienë dhe thotë se për këtë arsye amerikanët nuk shkojnë më atje. Sipas saj, ata “bëjnë gjëra skandaloze, të këqija dhe të mira” dhe janë në lidhje të drejtpërdrejtë me qeveritë. Madje, ajo beson se teknologji si iPhone-at janë produkte të inteligjencës së tyre.
“Ata janë shumë të zgjuar. Inteligjenca e tyre ndikon në zhvillimet teknologjike të Tokës.”
Për të ndjekur intervistën e plotë dhe rrëfimin e Zanës, klikoni në videon më poshtë:
