Që nga dita e inagurimit, sheshi i ri “Skënderbej” pothuajse çdo mbrëmje ka qenë i pasur me aktivitete të ndryshme. Në skenën e improvizuar janë ngjitur këngëtarë dhe grupe të njohur shqiptarë të cilët u kanë dhuruar njerëzve orë të tëra argëtimi.
Mbrëmjen e djeshme, siç e paralajmëroi dhe kryetari i bashkisë, Erion Veliaj i ftuari special ishte Noizy. Sigurisht, duke ditur simpatinë që të rinjtë kanë për reperin ishte e pritshme që i gjithë sheshi të mbushej plot dhe atmosfera të ishte elektrizuese. Përveç anëtarëve të grupit të Noizy-it e pranishme gjithashtu ishte Çiljeta, e cila performoi disa nga bashkëpunimet që ka me reperin.
E teksa i dhuruan turmës prej pothuajse 100.000 të rinjsh këngët hite të viteve të fundit dhe jo vetëm, Noizy kurrsesi nuk mund të mos performonte “Bow Down”.
Pavarësisht marrëdhënies aktuale mes tij dhe Encës e cila ende vazhdon të jetë e turbullt, reperi tërhoqi dje vëmendjen e të gjithëve gjatë kohës që interpretonte hitin e përbashkët.
Burime për Anabel.al tregojnë se gjatë kohës që nisi të këndonte “Bow Down”, Noizy nuk harroi ta përmendte ish-miken e tij të mirë, por jo ashtu siç mund ta prisnin të gjithë.
Duket se të pranishmit e kanë dëgjuar teksa reperi para fillimit të këngës u shpreh se këtë këngë e ka bërë me një vajzë që tashmë i kanë bërë “dalje” , duke na lënë të kuptojmë se nuk paska më asnjë shans që 2 këngëtarët t’i lënë mënjanë hatërmbetjet.
Por jo vetëm kaq. Noizy u kujdes që pothuajse gjatë gjithë këngës ta përfshinte emrin e Encës sa herë kishe mundësi, duke u shprehur më shumë se njëherë se: “Enca na vjen nga mbrapa”, sigurisht e harmonizuar kjo me tekstin e këngës.
Sipas burimeve, ai e mbylli këngën me një tjetër koment rreth këngëtares. “Enca duhet të jetë tek 15 katëshi tani, me snajper, gati për sulm”- tha duke qeshur reperi i cili mesa duket e ka kuptuar se dhe shakaja nuk ka kuptim të zgjasë pafund.
Edhe pse gjatë gjithë këtij konflikti, Enca është treguar e kujdesshme të reagojë qetë dhe me tone të zbutura, Noizy duket se e ka ndarë mendjen, të paktën këtë na tregojnë batutat e tij rreth saj.
