A ju ka ndodhur ndonjëherë të takoni një shoqe dhe, ndërsa ajo flet, ju mendoni se duket shumë më e re për moshën që ka? Nëse jeni ndër ata njerëz me fat që duken më të rinj sesa janë në të vërtetë, atëherë kemi lajme të mira, jo vetëm për pamjen, por edhe për shëndetin tuaj.
Sipas një studimi të realizuar nga studiues holandezë, njerëzit që duken disa vite më të rinj nga mosha reale kanë tendencë të jenë më të shëndetshëm.
Studiuesit analizuan rreth 2.700 persona të moshës 50 deri në 90 vjeç, duke u kërkuar vëzhguesve të pavarur të vlerësonin moshën e tyre në bazë të fotove të fytyrës, si në pamje ballore, ashtu edhe anësore/profil. Më pas, ata krahasuan këto vlerësime me të dhënat mjekësore të pjesëmarrësve.
Rezultatet ishin befasuese:
Personat që dukeshin të paktën 5 vite më të rinj kishin aftësi më të mira mendore, ndërsa rreziku i tyre për të pasur probleme shëndetësore, si katarakti, osteoporoza apo probleme të dëgjimit, ishte ndjeshëm më i ulët.
Sipas profesorit Tamar Nijsten, dermatolog dhe drejtues i studimit në Qendrën Mjekësore të Universitetit Erasmus në Roterdam, përfundimi është i qartë:
“Kur dukesh më i ri nga sa je, kjo pasqyron edhe moshën biologjike të trupit, trurit dhe organeve. Pamja e jashtme lidhet me një proces më të ngadalshëm plakjeje të organizmit.”
Edhe pse studimi nuk jep rezultate përfundimtare, ai është një nga dëshmitë më të forta deri më sot se mosha që “duket” një person është tregues i qartë i gjendjes së brendshme të trupit.
Çfarë tjetër zbuluan studiuesit?
1. Personat që dukeshin më të rinj kishin performancë më të mirë në testet e perceptimit.
2. Kishin 15% më pak gjasa të vuanin nga sëmundje të frymëmarrjes si sëmundja pulmonare obstruktive kronike (COPD).
3. Kishin 24% më pak gjasa të kishin osteoporozë.
4. Kishin 16% më pak gjasa të kishin nevojë për ndërhyrje për katarakt dhe 24% më pak për probleme me dëgjimin.
5. Ndër personat që morën vlerësimet më të larta, shumica ishin meshkuj (61%), jo duhanpirës.
Studiuesit theksuan gjithashtu se këto rezultate mbështesin praktikat e mjekëve që përdorin pamjen e jashtme si një tregues shtesë të gjendjes shëndetësore së pacientëve.
