Teksa qeveritë dhe ekspertët e shëndetit merreshin me analizën e Covid-19, shitjet e dezinfektuesve të duarve u rritën ndjeshëm. Nëpër supermarkete dhe farmaci, është pothuajse e pamundur të gjesh xhel për duart. Mirëpo, a është vërtet efektiv përdorimi i dezinfektuesve ndaj koronavirusit? Dhe nëse po, a mund ta përgatisim në shtëpi nëse nuk gjejmë dot në dyqan?

Dezinfektuesi i duarve nuk është një produkt i ri. Që në 1966-n, një infermiere në Kaliforni nisi të përdorte xhel me bazë alkooli për të pastruar duart në mungesë të ujit të rrjedhshëm. Sidoqoftë, do të ishte pandemia e gripit H1N1 në 2009 që do të shënonte shitje rekord për xhelin e duarve. Që prej asaj kohe, ai u bë një produkt të cilin njerëzit e mbanin me vete në çantë.

Popullariteti i dezinfektuesve të duarve është rritur jo vetëm nga frika e pandemive, por edhe nga marketingu që u është bërë, duke i bërë në ngjyra dhe aroma të këndshme, qoftë edhe për fëmijët.

Mirëpo në ditë të tilla, ku është rritur kërkesa, vështirë të gjesh. Receta në internet sugjerojnë përdorimin e vodkës ose kombinimin e bimëve të ndryshme me aloe vera. Por a janë efektive?

Ekspertët e higjienës pajtohen me mendimin se që një produkt të jetë efektiv kundër viruseve dhe baktereve, duhet të përmbajë 60% alkool. Për njerëzit me lëkurë të ndjeshme, tani prodhohen edhe produkte pa alkool. Për fat të mirë, koronavirusi i ri është një lloj virusi, të cilin alkooli mund ta sulmojë. Prandaj, përgatitja e produkteve në shtëpi nuk është fort efektive. Aq më tepër, që dezinfektuesit përmbajnë edhe zbutës, për të mbrojtur lëkurën.

Ekspertët theksojnë gjithashtu se është ende e paqartë sesi përhapet Covid-19. Mendohet se rruga e transmetimit mund të jetë përmes pikave të kollës, ose nga kontakti me objekte. Këshilla më e vlefshme në të tilla raste është larja e duarve me ujë dhe sapun. Mund të përdorni xhel dezinfektues, por duhet të lani patjetër duart kur të mbërrini në shtëpi, zyrë, lokal ose kudo tjetër ku ka ujë të bollshëm dhe sapun.

Virusi ka nevojë për qeliza të gjalla për t’u riprodhuar: kështu që mos prekni sytë, gojën ose vendet me plagë të hapura. E thënë më fjalë të tjera, përdorni xhel atëherë kur nuk mundeni dot të lani duart. Nuk bëhet fjalë për situatë paniku, thjesht disipinë.

Burimi: The Guardian