Sezoni i katërt i “Shiko kush luan” nisi pa ndryshime te kapitenët e skuadrave, Florian Binaj dhe Rezart Veleshnja, të paktën për emisionin e parë.
Në puntatën e dytë, Veleshnja u zëvendësua nga aktori i “Portokalli”, Irgen Çela, i njohur si Xhoda, i cili duket se u përshtat me lehtësi në program dhe nisur nga komentet online, të shumtë janë njerëzit që përgëzojnë aktorin. Por nga ana tjetër janë edhe ndjekësit që pyesin “Ku është Rezi?”. Komentet e vetme të Luanës për ardhjen e Xhodës në emision qenë "Filluam kështu sonte" dhe "Sonte ju premtoj se do të qeshni si asnjëherë më parë në superemisionin e dytë. E vutë re surprizën?"; komente të bëra te mbishkrimet e postimeve në Instagram.
Zëvendësimi në program qe i befasishëm dhe çfarë e bën më të dyshimtë situatën është fakti se asnjë prej palëve nuk ka komentuar. Përpos kësaj, Luana e ka hequr Veleshnjën nga lista e njerëzve që ndjek në Instagram dhe po kështu ka hequr emrin e tij nga etiketimet (tag) në postimet e mëparshme.
Sipas Dosja.al, moderatorja dhe autorja e programit, Luana Vjollca, ka pasur një debat të fortë pas kuintave me aktorin, debat që pretendohet se ka rezultuar në largimin e tij nga emisioni. Dosja.al thotë se programi është dashur të regjistrohet nga e para. Ndërsa Prive.al raportoi në fillim të tetorit se emisioni ku u shfaq Xhoda u regjistrua në shpejtësi, sepse ishte parashikuar një puntatë me të ftuara Miss-et shqiptare. Shtojmë se gjithashtu një ndjekëse shkruan në komentet e Luanës për emisionin e dytë: “Po sikur emisioni i dytë do ishte me veshje të zeza?”.
Sidoqoftë, duket se largimi i aktorit vjen si pasojë e një mosmarrëveshjeje mes palëve. Anabel.al iu drejtua Luana Vjollcës dhe Rezart Veleshnjës për vërtetësinë e zërave që po qarkullojnë, por asnjë prej tyre nuk ka komentuar.
Përditësim: Rezart Veleshnja flet për largimin nga ‘Shiko kush luan’
