7 vite më parë, Dafina postoi këngën “Time Out”, për të gjithë ata që u shprehën “se e bënë Dafinën”, apo për të gjitha mediat që dukej se donin “ta martonin me zor”.

Klipi i atëhershëm, shfaq Dafinën drejt një altari të errët, veshur me të zeza dhe me një buqetë trëndafilash të zi në duar.

Mesa duket, 7 vitë më vonë, Dafina është rikthyer përsëri me pak a shumë të njëjtën metaforë, por kësaj radhe sjellë shumë më ndryshe.

Në fotot e postuara nga klipi i ri i saj, Dafina shkruan:

“Faleminderit për fejesën, faleminderit për martesën, caktoni datën edhe çomani ftesën”, që është pjesë nga teksti i këngës “Time Out”.

Edhe “Million $” është një shuplakë për të gjithë ata që mendojnë se Dafinës, apo çdo gruaje tjetër i duhet një burrë për të bërë para apo për të arritur sukses dhe për të gjithë ata që nuk besojnë se mund t’ja dalësh mbanë edhe vetëm, edhe nëse je grua.

Fotot janë postuar në Instagram-in e Dafinës

Në një pjesë të këngës, Dafina thotë “Kurr m’u përul, krytë nalt gjith’ i kam majt”, por në fillim të klipit, ajo përulet në drejtim të kamerës, për të treguar se këngëtarja i “përulet” vetëm publikut dhe të gjithë atyre që dëgjojnë muzikën e saj:

Në vazhdim të klipit, një nga vajzat e videos, shfaqet duke “përkundur” djepin e mbushur plot me para dhe në një moment, katër vajzat pinë çaj dhe qëndrojnë “këmbë përmbi këmbë”, ndërkohë që në shumë tradita shqiptare të dasmave, nusja duhet t’i shërbejë burrit të ardhshëm dhe të afërmve të tjerë kafe apo çaj.

Në skenën tjetër, Dafina qëndron në një dhomë, nga rrobalarësja e së cilës dalin para dhe në telat që përdoren për të tharë rrobat, ka përsëri para të varura.

Çdo skenë është një analogji e asaj që shoqëritë, kryesisht patriarkale, presin që të bëjnë gratë: të lindin shumë fëmijë. të qëndrojnë në shtëpi, të shërbejnë çaj dhe të lajnë e thajnë rrobat. Të gjitha këto, Dafina i zëvëndëson me para, me suksesin e saj.

“Dasma” e Dafinës është pikërisht kjo. Ajo është e martuar me atë që do të bëjë më së shumti në jetë, muzikën dhe që i ka sjellë suksesin dhe “miliona dollarët" që përkundeshin në djep.

Në skenat e fundit, shfaqet një lëndinë e madhe me shumë lopë dhe një qerre me ar, mbi të cilat është ulur Dafina, teksa thotë: “Ju jeni spektatora!”

Këngëtarja ironizon klishetë me shumë nga skenat e klipit dhe na tregon se çdo grua e zgjedh vetë mënyrën se si do të jetojë. Por mes gjithë nënkuptimeve që ajo ka përcjellë, Dafina ka bërë njëkohësisht edhe një promovim tradicional-modern të veshjeve folklorike shqiptare, të cilat duken aq bukur.