Chris Brown u arrestua sot në mëngjes në Manchester, Angli, pasi dyshohet se ka goditur producentin muzikor Abe Diaw me një shishe tekile në kokë në një klub nate në Londër, në vitin 2023.

Sipas Policisë Metropolitane, këngëtari, 36 vjeç, u ndalua në një hotel luksoz, nën dyshimin për “shkaktim të dëmtimeve të rënda trupore”.

“Ai është në paraburgim dhe vazhdon të mbahet nën arrest,” – tha policia për The Sun.

Ngjarja lidhet me një incident të ndodhur më 19 shkurt 2023, në një klub nate në zonën Hanover Square të Londrës. 

Në tetor të vitit 2023, producenti Abe Diaw paditi Brown duke e akuzuar për sulm fizik. Sipas padisë, këngëtari e ka goditur në kokë me një shishe tekile dhe më pas e ka shkelmuar dhe goditur brutalisht në qafë, duke e lënë pa ndjenja për rreth 30 sekonda.

Producenti pretendon se nga sulmi pësoi çarje në kokë dhe këputje ligamentesh në këmbë, duke përfunduar në spital.

Ai gjithashtu e akuzon Brown për shpifje dhe përhapje thashethemesh të rreme, përfshirë akuzat se ishte hajdut – gjë që sipas padisë dëmtoi rëndë reputacionin dhe marrëdhëniet e tij profesionale.

Chris Brown nuk ka reaguar ende publikisht për ngjarjen.

Një histori me përsëritje

Chris Brown ka pasur disa përplasje me ligjin gjatë karrierës së tij 20-vjeçare.

Në vitin 2009, ai u shpall fajtor për sulm fizik ndaj ish-të dashurës së tij, Rihanna.

Në 2017, ish-e dashura tjetër, Karrueche Tran, siguroi një urdhër ndalimi pesë-vjeçar kundër tij, duke e akuzuar për kërcënime dhe sjellje agresive pasi ajo refuzoi t’i kthente dhuratat dhe paratë që ai i kishte dhënë gjatë lidhjes.

Artikuj të sugjeruar:

_{Burimi: Page Six}