Premiera e serialit $NOB u mbajt mbrëmjen e djeshme në një ceremoni madhështore me qindra të ftuar, ku produksioni, kasti, bashkëpunëtorët dhe sponsorat festuan punën kolosale 1-vjeçare dhe prezantuan ekskluzivisht disa “copëza” të $NOB.
Mbajtur në Kinema “Millenium”, eventi promovues i $NOB bëri bashkë emra të njohur nga Shqipëria dhe Kosova. Të pranishëm ishin figura të njohura të artit, televizionit, biznesit, influencers, aktorë dhe këngëtarë të njohur, ku përmendim këtu Timo Flloko dhe Vera Grabocka, Ardit dhe Anila Gjebrea, Elvana Gjata, Rudina Magjistari, Alketa Vejsiu, Saimir Kodra, Salsano Rapi, Anila Basha, Balina Bodinaku, Xhemi Shehu, Armand Peza, Marçela Lati etj.
Pas pak momentesh pritjeje, bashkë-producentët Dalina Buzi dhe Ols Abazi si edhe regjisori Redi Treni, falenderuan të pranishmit për pjesëmarrjen dhe ndanë me ta disa nga përjetimet personale gjatë xhirimeve të serialit. Ols Abazi tregoi se pavarësisht çdo vështirësie, ata ishin të vendosur që $NOB ta sillnin te publiku sipas standardeve bashkëkohore botërore, regjisori Redi Treni vlerësoi frymën e bashkëpunimit të të gjithëve, ndërsa krijuesja Dalina Buzi e konsideroi serialin si momentin më të rëndësishëm të karrierës së saj 20-vjeçare.
Pas fjalimeve, më në fund prezantohen disa pjesë nga $NOB. Të ulur në sallën e kinemasë, të ftuarit patën mundësinë të shihnin një dokumentar me prapaskena, rrëfime, momente gjatë xhirimeve dhe pjesë ekskluzive të serialit. Duartrokitjet në sallë qenë të pranishme vazhdimisht gjatë dokumentarit.
Mbrëmja vazhdon në ambientet e jashtë të kinemasë dhe vëmendja tani përqendrohet tek ata – kasti. Të vendosur përpara banerit të $NOB, aktorët e serialit, figura të njohura të kinemasë shqiptarë, emra të rëndësishëm të momentit si edhe aktorët e rinj që pritet të shkëlqejnë, pozojnë para fotografëve, ndajnë përshëndetje dhe biseda me të pranishmit dhe shijojnë momentin e tyre.
Kështu u mbyll edhe mbrëmja, mes bisedave të shumëllojshmërisë së të ftuarve, që dëshmon se $NOB pritet të mos i përkasë vetëm një brezi apo grupi njerëzish, për aq kohë sa historia përcjell një realitet të cilin e përjetojmë dhe na përfshin të gjithëve, pavarësisht ndryshimeve që na dallojnë.
$NOB nis transmetimin më 7 nëntor në orën 20:00 në ekranin e Top Channel. Deri atëherë, gjithë çfarë kemi për momentin janë fotot nga eventi.
Të gjitha fotot gjatë eventit janë realizuar nga fotografja Ina Omuri.
Copyright Anabel.al / Ndalohet ribotimi pa lejen e redaksisë.
