U duk sikur në natën e parë të Festivalit të Këngës në RTSH, gjithçka shkoi mirë, por s'mund të themi të njëjtën gjë për Ronelën. Këngëtarja, e cila ishte fituese e Festivalit të Këngës vitin e shkuar me "Sekret" dukej e revoltuar me organizatorët, duke thënë se "kërkojnë me zor të bëjnë armiq nga hiç". 

Çfarë ndodhi?! 

Nga Instastory-t e postuara prej këngëtares u duk sikur ishte gjithçka gati për të performuar në skenë këngën fituese, por në fakt Ronela nuk performoi derisa para pak orësh, në një tjetër postim shkruan:

"Më ka aq shumë ky shpirt e kjo gojë për të folur, por më duket sikur do t'i heq vetes riskun që Zoti do ma japë një ditë, për të gjithë atë që meritoj për kaq shumë vite punë, lot, mundim, pasion e dashuri të madhe për muzikën. Unë nuk isha e ftuar për të performuar këngën fituese ashtu siç duhet!"Sekret" e ka marrë gjithë dashurinë që ka pasur nevojë e për këtë i jam mirënjohëse vetëm publikut këtu dhe jashtë. Drejtimi mediokër e i vogël me veprime skuthe duke mos më përfshirë mua as në siglat e festivalit nuk e heq dot suksesin e këngës. T'ju shaj?! Kurrë! S'ka fjalor që mund t'i përshtatet neverisë që më keni përcjellë. Në të gjithë botën vetëm mediat shqiptare kërkojnë të bëjnë armiq nga hiçi."

Dukshëm, revolta dhe mllefi i Ronelës duket se është me organizatorët e spektaklit dhe faktin që nuk ka performuar. Ndërkohë, Anabel.al kontaktoi me organizatorët e Festivalit të Këngës dhe është në pritje të një deklarate.

Në këtë edicion të Fest 61, është vendosur që kënga përfaqësuese e Shqipërisë në Eurovizion do të zgjidhet nga vetë publiku, përmes votave me SMS. "Festivali i Këngës" vazhdon transmetimin dhe në datat 20, 21, 22 dhjetor.