Akti final i dashurisë së Rene Angelil ndaj të shoqes, Celine Dion, ishte t’i hiqte asaj dhimbjen e organizimit të funeralit të tij.
Ceremonia që do të mbahet më 22 janar në bazilikën e Notre-Dame në Montreal, ishte planifikuar prej vetë Rene-së, disa muaj përpara vdekjes së tij, pas një lufte të gjatë e të mundimshme me kancerin në fyt. Bazilika e Notre Dame-it kishte një kuptim të veçantë për çiftin, pasi ata kishin shkëmbyer aty betimet, në 1994-ën.
Mijëra fansa priten të jenë pjesë e ceremonisë, e cila do të mbahet nën mbrojtjen e forcave të sigurisë së shtetit. Ndërsa gjatë kësaj kohe, policia kanadeze ka veshur kostume kamuflazhi në protestë për rrogat e tyre, ata do të vishen me uniformat e tyre vetëm për këtë ditë në shenjë respekti për Celine dhe Rene.
Ceremonia do të transmetohet edhe në televizionet kanadeze.
Angelil ndërroi jetë më 14 janar, 2 ditë përpara ditëlindjes së tij të 74-t. Celine, e cila është parë shumë rrallë në skenë vitet e fundit, qëndroi me të gjatë gjithë luftës së tij ndaj kancerit, deri në momentet e fundit të jetës. Vetëm 2 ditë më pas, vëllai i saj, Daniel, ndërroi jetë nga një kancer në tru, gojë dhe fyt. Ceremonia mortore e Danielit do të mbahet më 23 janar në Salon Charles Rajotte, një kompleks funeral në Montreal.
Burimi: Yahoo; Përshtati: Genta Hodo
