Në një kohë kur kujdesi për veten dhe qetësia mendore promovohen si prioritete jetësore (me plot të drejtë), disa njerëz e çojnë këtë filozofi në ekstrem. Ata fillojnë të injorojnë të tjerët dhe të përqendrohen vetëm te vetja, shpesh në kurriz të ndjenjave dhe mirëqenies së partnerëve apo të afërmve të tyre.
Ky lloj sjelljeje egoiste, që në pamje të parë mund të duket si “vendosje e kufijve”, në fakt maskon mungesën e empatisë dhe quhet “banksying”, një formë moderne e manipulimit emocional në marrëdhënie.
Çfarë është “banksying”?
Termi rrjedh nga emri i artistit të famshëm britanik Banksy, i njohur për artin e tij që shfaqet papritur, në mënyrë të fshehtë dhe të befasishme në hapësira publike.
Në kontekstin e marrëdhënieve, banksying përshkruan sjelljen e një partneri që largohet papritur, pa paralajmërim apo shpjegim. Duket sikur “zhduken nga faqja e dheut”, duke lënë tjetrin të hutuar, të lënduar dhe pa asnjë sqarim.
Por në realitet, largimi nuk është aq spontan sa duket. Shpesh personi ka kaluar javë apo muaj duke e planifikuar, duke u ftohur emocionalisht, ndërsa sillet sikur gjithçka është në rregull.
Sipas ekspertes së marrëdhënieve Amy Chan, banksying është thjesht një mënyrë për të shmangur përgjegjësinë emocionale.
“Personi që tërhiqet e ka përpunuar ndarjen me kohë dhe e jep lajmin kur është emocionalisht i përgatitur, ndërsa partneri tjetër mbetet i tronditur. Kjo sjellje është egoiste, e papjekur dhe tregon paaftësi për të përballuar konfliktet.”
Në epokën e aplikacioneve të takimeve, ku lidhjet krijohen dhe shuhen me shpejtësi, kjo mënyrë ndarjeje është bërë gjithnjë e më e zakonshme.
Si ta dallosh kur dikush po “banksyon”?
Edhe pse mund të jetë e vështirë për ta kapur menjëherë, ka disa sinjale që nuk duhen injoruar:
Sjellja e tyre bëhet e çuditshme, por fjalët nuk përputhen me veprimet.
Fillojnë të të japin më pak kohë, më pak vëmendje dhe më pak përkushtim.
Mund të sillen si gjithmonë, madje ndonjëherë edhe më të përkushtuar, vetëm për të mos “u kapur në flagrancë”.
Ndjen që diçka ka ndryshuar, por kur i pyes, të thonë se "gjithçka është në rregull".
Siç thotë një ekspert:
“Ata nuk flasin me fjalë, por sjellja e tyre flet shumë. Mos e injoro ndjesinë që ke. Nëse diçka duket gabim, zakonisht është.”
Çfarë mësojmë nga kjo sjellje?
Fenomeni banksying na tregon një realitet të hidhur: shumë njerëz po bëhen gjithnjë e më të paaftë për të përballuar situata të pakëndshme emocionale. Në vend që të flasin hapur dhe të ndahen me dinjitet, ata zgjedhin heshtjen dhe shmangien, duke shkaktuar dhimbje të panevojshme.
Në thelb, banksying nuk ka të bëjë me vetëkujdesin, por me mungesë të empatisë, komunikimit dhe maturisë emocionale.
Nëse e sheh këtë sjellje tek dikush që ke afër, mos e injoro. Dhe nëse je duke e bërë vetë këtë, ndalo dhe pyet veten:
A po mbroj veten time, apo po lëndoj dikë tjetër për të shmangur një bisedë të vështirë?
