Trupi gjykues në procesin ndaj reperit të njohur amerikan Sean “Diddy” Combs ka arritur një vendim për katër nga pesë akuzat me të cilat përballet ai, por ende nuk ka marrë një vendim për akuzën kryesore, konspiracionin për organizatë kriminale.
Vendimi i pjesshëm nuk u bë publik, pasi trupi gjykues njoftoi se ishte i ndarë dhe nuk kishte arritur një marrëveshje unanime për akuzën më të rëndë. Gjyqtari Arun Subramanian, së bashku me prokurorët dhe ekipin mbrojtës të Diddy-t, ranë dakord se pas vetëm dy ditësh diskutimi, ishte ende herët për të braktisur përpjekjet për të arritur një vendim të plotë.
Në vend që të pranohej vendimi i pjesshëm, gjyqtari urdhëroi trupin gjykues që të vazhdonte diskutimet lidhur me akuzën e fundit. Seancat do të vijojnë gjatë së mërkurës.
Zhvillimet ndodhën të martën pasdite, kur trupi gjykues paraqiti një shënim ku thuhej se nuk ishte në gjendje të arrinte një vendim unanim për akuzën për organizatë kriminale, pasi disa anëtarë kishin qëndrime të pandryshueshme në të dyja anët.
Akuza për konspiracion për organizatë kriminale është më e ndërlikuara nga të gjitha, pasi kërkon që trupi gjykues të vendosë jo vetëm nëse Diddy ka udhëhequr një rrjet kriminal, por edhe nëse ai ka marrë pjesë në krime specifike si rrëmbim apo zjarrvënie.
Megjithatë, në më pak se 13 orë diskutime, trupi gjykues ka arritur një vendim për dy akuza për trafikim seksual dhe dy për transportim me qëllim përfshirje në prostitucion. Këto të fundit lidhen me pretendimet se Diddy ka organizuar fluturime për të çuar gra dhe punëtore seksi përtej kufijve shtetërorë.
Nëse shpallet fajtor, akuza për trafikim seksual mban një dënim minimal prej 15 vitesh burg dhe maksimal deri në burgim të përjetshëm. Akuza për transportim për qëllime prostitucioni mund të sjellë deri në 10 vjet burg.
Akuza e mbetur, më e rënda nga të gjitha dhe ajo për të cilën ende nuk ka vendim – konspiracioni për organizatë kriminale – mban gjithashtu një dënim maksimal me burgim të përjetshëm.
Diddy, 55 vjeç, u shfaq i zymtë në sallën e gjyqit pasi u njoftua për qëndrimin e trupit gjykues. Ai u pa duke lexuar një letër që iu dorëzua nga avokati i tij, Marc Agnifilo. Më pas, ndërsa trupi gjykues u kthye në sallë për të marrë udhëzime nga gjyqtari dhe u largua sërish, Diddy qëndroi i ulur për disa minuta në heshtje.
Në momentin që u ngrit për të dalë nga salla, ai u kthye nga të afërmit dhe mbështetësit e tij në audiencë, dërgoi një puthje në ajër dhe preku zemrën – një gjest që ai e ka bërë shpesh në fillim dhe në fund të seancave gjyqësore. Para se të largohej, ndaloi pranë nënës së tij, Janice Combs, dhe i tha: “Të dua. Do të jem mirë.” Më pas, u shoqërua jashtë sallës.
Combs, i njohur më shumë si Diddy, ka mohuar të gjitha akuzat. Avokatët e tij pretendojnë se prokurorët po përpiqen të kriminalizojnë stilin e tij të jetesës si "swinger" (person që merr pjesë në marrëdhënie seksuale të ndërsjella me partnerë të tjerë, zakonisht me pëlqimin dhe pjesëmarrjen e partnerit/partneres së vet) dhe se, nëse ka ndodhur ndonjë shkelje, ajo është më shumë në kuadër të dhunës në familje sesa krime federale.
Burimet: Euronews, AP
