Jane Birkin/ Mike Daines/Shutterstock

Një çantë e përdorur, e gërvishtur dhe e njollosur, por me një histori legjendare. Çanta origjinale Hermès Birkin, e përdorur personalisht nga Jane Birkin për vite me radhë, u shit për plot 10 milionë dollarë në ankandin e organizuar nga Sotheby’s, duke u kthyer në çantën më të shtrenjtë në histori.

Po flasim për versionin e parë fare të Birkin-it, të krijuar enkas për aktoren dhe këngëtaren britanike që i dha emrin këtij aksesori tashmë ikonik. Ajo e përdori çdo ditë nga viti 1985 deri më 1994, shumë përpara se të kthehej në simbolin e luksit absolut.

Në ankand, oferta përfundimtare u dha nga një koleksionist privat nga Japonia, pas një “beteje” që zgjati 10 minuta mes 9 personave. Ky ishte një moment historik për modën.

Pse kjo çantë u shit për kaq shumë para?

Sipas Sotheby’s, një nga shtëpitë më të mëdha dhe më të njohura të ankandeve në botë, çanta “e parë” ka disa veçori unike që nuk janë riprodhuar kurrë më pas, të tilla si madhësia, dizajni i rripave, pjesët metalike dhe detajet personale të Jane. Për shembull, kapaku i çantës mban inicialet J.B. dhe një prehëse e vogël për thonjtë është e varur në rripin e saj, sepse Birkin donte gjithmonë të kishte thonjtë në rregull.

Madje, në çantë gjenden ende shenja nga sticker-at e organizatave humanitare Médecins du Monde dhe UNICEF, një kujtesë e angazhimit të saj për kauzat sociale. Jane e shiti çantën në vitin 1994 për të ndihmuar kërkimin për HIV/AIDS.

Në një intervistë me Christiane Amanpour në vitin 2020, Birkin tha me humor:

“Kur të vdes, ndoshta do të flasin vetëm për çantën.”

Ajo u nda nga jeta në vitin 2023, në moshën 76-vjeçare, por çanta e saj do të jetojë gjatë në historinë e modës.

Ndryshe nga fansat e sotëm të Birkin-it që i ruajnë çantat si relike, Jane e përdorte të sajën përditë. Dhe nuk ishte krijuar për luks, por për prakticitet! Legjenda thotë se ideja e çantës lindi gjatë një fluturimi Paris-Londër, ku Jane i ankohej Jean-Louis Dumas (ish-CEO i Hermès) se nuk gjente një çantë të madhe sa valixhja e saj, kështu ajo nisi ta vizatonte çantën që donte në një qese për të vjellat, që gjenden në avionë.

Çanta ka ndërruar disa herë pronarë që nga viti 1994, por është ekspozuar herë pas here në muze si MoMA në New York dhe Victoria & Albert Museum në Londër. Pronarja e fundit, e identifikuar si Catherine B., tha se momenti i shitjes e riktheu emocionalisht në kohën kur vetë ajo luftonte për ta fituar këtë copë historie.

Për të bërë një krahasim, në të kaluarën, çantat më të shtrenjta ishin Birkin me diamante ose lëkurë krokodili, me çmime që shkonin deri në 500,000 dollarë. Por asgjë nuk i afrohet këtij rekordi shitjeje.

“Ky është një moment kyç për historinë e luksit dhe modës,” – u shpreh Morgane Halimi nga Sotheby’s. “Një tregues se sa e fuqishme është një legjendë.”

Dhe nëse ndonjëherë keni menduar se një çantë nuk mund të jetë pjesë e trashëgimisë kulturore, mendohuni edhe një herë. Sepse çanta që nisi si nevojë praktike, tani vlen më shumë se shumë apartamente në Manhattan.

_{Burimi: CNN}