Gazetarja 40-vjeçare e BBC-së mori një telefonatë që do t’i ndryshonte tërësisht jetën një vit më parë, ku dikush përtej telefonit i tha: “Kemi lajme të këqija”. Edhe pasi u diagnostikua me kancer në gji, ajo u përpoq të jetonte normalisht; të shkonte në punë, të shëtiste vogëlushin e saj 1-vjeçar, Freddie-n, të drekonte me familjen. Megjithatë duket se Rachael po përjeton momentet më të vështira, nisur kjo nga postimet e saj në Twitter që kanë përlotur gjithë ndjekësit, familjarët dhe miqtë e afërt.

“Njësoj siç tha legjenda Frank Sinatra – Kam frikë se ka ardhur koha miqtë e mi. Krejt papritur. Më kanë thënë se kam edhe pak ditë [jetë]. Është kaq surreale. Faleminderit të gjithëve për gjithë mbështetjen tuaj. Mirupafshim miqtë e mi”, shkruan gazetarja.

Ndër të tjera, Rachal Bland deklaroi pak kohë më parë se do të shkruante një libër për të birin, që do t’i shërbejë si guidë në të ardhmen.

“Ishte një ide që e pata sapo u diagnostifikova, por nuk mendova se do më duhej ta vendosja vërtet në aksion. Sapo mora lajmin nisa të shkruaj. Dëshiroja të lija pas diçka për tim bir. Kur të rritet ai do t’i mësojë të gjitha historitë nga burri im, Steve. Por Steve nuk i mban mend gjërat ashtu siç i mbaj mend unë. Ndaj dua që përmes fjalëve të kuptojë personalitetin tim dhe të më dëgjojë zërin. Kapitulli i fundit do të jetë një mesazh përmbyllës për Freddie- n. Dua që ai të dijë se mund të bëhet çfarë të dëshirojë në jetë. S'dua të më harrojë! Mërzitem shumë kur mendoj: Nëse do të jetë i mërzitur për ndonjë gjë, si do ia dalë pa mua aty në krah? Dua ta shoh Freddie- n të shkojë në shkollë, universitet, t’i bashkohet një skuadre futbolli etj etj.”

Burimi: BBC