Në SH.B.A., Action Bronson njihet si reperi i koncerteve të çmendura, i fiksuar pas kuzhinës. Ai madje drejton edhe një emision ku shpalos këto dy pasione të tij por të paktë janë ata që e dinë se Action Bronson, emri i të cilit është Arian Asllani, është me origjinë shqiptare. Një gjë të tillë e ka trumbetuar këngëtarja nga Kosova, Rita Ora, e cila disa ditë më parë, ka postuar në Instagram një foto me Action Bronson dhe u bënte thirrje të gjithëve, veçanërisht shqiptarëve, të blinin albumin e tij të sapopublikuar.(lexo këtu)
Action Bronson ka lindur në Kuins të Nju Jorkut. Babai i tij është një emigrant shqiptar ndërsa nëna një njujorkeze hebreje. 31-vjeçari, përpara se t’i dedikohej karrierës së tij si reper, ishte një shef kuzhine gourmet i respektuar në Nju Jork. Ai drejtonte edhe një emision gatimi online që titullohej ‘Action in the kitchen” por pasi theu këmbën në kuzhinë, Ariani iu dedikua tërësisht muzikës, që fillimisht ishte thjesht një hobi.
Albumi i tij i parë me titull “Dr.Lecter” u publikua në vitin 2011 dhe tani ai numëron me qindra mijra fansa.
Ai sëbashku me J.Cole dhe Kendrick Lamar kanë kënduar krah Eminem në koncertet e tij në Australi dhe Zelandë të Re. Prej Majit të vitit 2014 ai drejton një tjetër emision online që mban titullin “F*ck that’s delicious” ku tregon aventurat e tij në eksplorimin e botës së kulinarise, kombinuar me pasionin e tij për muzikën.
"The Daily Beast" e quan reperin që bën rima për ushqimin si udhëheqësin e zgjimit të hip-hopit në Nju Jork.
