Ndoshta, ju jeni prind i një apo dy fëmijëve, por keni sërish dëshirë që ta shtoni familjen dhe po mendoni për një tjetër pjesëtar të ri. Sipas Nan Wise, terapiste e certifikuar për çiftet dhe familjen, duket se ka disa pyetje të rëndësishme që duhet t’i bëni vetes përpara se të ndërmerrni hapin për shtatzëninë e radhës.
#1 Pse doni të keni një fëmijë tjetër?
Duket një pyetje kritike për t’ia bërë vetes, por në fakt planifikimi familjar duhet të ekzistojë në çdo çift. Siguria financiare, shtëpia, pritshmëritë e partnerit/es, të gjithë janë detaje që duhen analizuar.
#2 Si ndihet partneri/ja juaj për një fëmijë tjetër?
Kjo ndoshta është e vetëkuptueshme, por nëse e shtroni si ide te partneri/ja për të pasur një fëmijë tjetër, atëherë duhet të bëni biseda të rëndësishme përgatitore që janë tregues për qasjen ndaj zgjerimit të familjes.
#3 Pse ju (dhe partneri/ja juaj) dëshironi të keni një fëmijë tjetër tani?
Koha është gjithçka, kjo është arsyeja pse ekspertja sugjeron që t'ia bëni këtë pyetje vetes dhe partnerit/es tuaj përpara se të vazhdoni me ndonjë plan për fëmijën.
#4 Si e përballoni zgjidhjen e konflikteve dhe stresit si çift?
Debatet apo mosmarrëveshjet në çift janë normale dhe të pashmangshme, por rruga që ju si çift gjeni për t’i zgjidhur ato është tregues i qartë për shumë situata, sidomos pas idesë për shtimin e familjes.
#5 Si do të ndikojë në jetën tuaj një fëmijë tjetër?
E mbani mend se çfarë ndryshimi i madh ishte në jetën tuaj kur lindi fëmija i parë? Merrni pak kohë dhe mendoni, një tjetër fëmijë, të qara, net pa gjumë, angazhimi me fëmijët e tjerë më të rritur, punët e shtëpisë, sa kërcënohet siguria në punën aktuale që keni etj.
#6 A keni mjaftueshëm vëmendje për t’ia kushtuar fëmijës tjetër?
Le të flasim për boshllëqet e moshës dhe qëndrueshmërinë prindërore, pasi ju duhet të merrni parasysh nivelin tuaj të energjisë. Por, ekspertja Wise thekson rëndësinë e vëmendjes dhe përshtatjes për çdo fëmijë, diçka që është padyshim e vështirë për t'u siguruar kur je i/e ndarë në dy drejtime të ndryshme duke u përpjekur të plotësosh nevojat e një të porsalinduri dhe të një foshnjeje.
#7 A keni qëndrueshmëri fizike dhe emocionale për këtë?
Pyetja më direkte që mund t’i bëni vetes është pikërisht kjo: sa energji keni për të përballuar edhe një porsalindur në shtëpi, ndërsa keni një apo të tjerë fëmijë më të rritur që duan vëmendjen dhe angazhimin tuaj si prindër.
Artikuj të sugjeruar:
