Pse reperet i bëjnë diss njëra-tjetrës?: Dihet tashmë që muzika rep është ajo që po dominon tregun vendas dhe sigurisht edhe atë ndërkombëtar. Në vetëm pak minuta, mund të listojmë me dhjetra reperë, e ndoshta një dorë repere (megjithëse po shtohen gjithnjë e më shumë këto kohët e fundit). Edhe në tregje të mëdha muzikore, si ai amerikan, Nicki Minaj ishte e vetme në fron, deri kur u shfaq Cardi B. Për një arsye të panjohur, gratë konkurrojnë me gratë dhe burrat me burrat. Kaq e thjeshtë dhe e ndërlikuar është!
Pse po ‘sulmojnë’ vetëm Tayna-n?: Tayna nuk është e para repere shqiptare. Të gjithë të lindurit e viteve ’90 e kujtojnë mjaft mirë MC Memon tek “Top Fest” në vitin 2005 me këngën “Na jem”, apo reperen Gjira.
Mirëpo për arsye të ndryshme – si për shembull përkushtimi vetëm tek familja, një karrierë tjetër larg muzikës etj – një pjesë e tyre nuk arriti atë suksesin e bujshëm, ose më mirë të themi suksesin që mund të krahasohej lehtësisht me atë të reperëve. Ndryshe nga ç’ishim mësuar, Tayna, krej papritur ashtu si nga hiçi, goditi menjëherë me “Columbiana”. Të gjithë kthyem sytë nga ajo, miliona klikime në vetëm pak ditë e më shumë se gjysmë milioni ndjekës në Instagram brenda pak muajsh. Fama vjen me të mirat dhe të këqijat e saj; përfshirë këtu edhe diss-et.
Si qëndron puna me diss-et?: Në emisionin “Mirage”, Rina Balaj komentoi për herë të parë këngën “Columbiana”.
“Kam parë që kanë dalë shumë reperka të reja. Këngën e Tayna-s e kam dëgjuar pak. Nuk e njoh personalisht. Kënga është e mirë, po versioni anglisht i Stefflon Don më pëlqen më shumë. Komenti im.”
E kështu vazhduan thumbimet me tekste si “krejt e din kush o mami” (Rina) dhe “t’kallxoj unë kush o mami” (Tayna).
Më pas, në “luftën” e diss-eve u fut edhe Fifi, e cila në këngën “Habibi”, reponte: “S’më bën përshtypje nëse e ki belin e hollë/ mos i jep vetes rëndësi se je t’u u kalb n’silikon.” Të gjithë e kuptuan si thumbim ndaj Tayna-s që në këngën “Columbiana” thotë: “Beli qaq i hollë, dy kolona me i qit.”
Tayna zgjodhi të kundërpërgjigjej me një ton më diplomatik: "Nuk kam asnjë problem me asnjërën edhe kam qejf që femrat të arrijnë sa më lart, por duke mos e gënjyer veten. Ama kur të më kapësh mua duhet të ndalosh të mendohesh dy herë. ”
Sigurisht që Fifi s’e la me aq: “Vëmendje. Kur t’ia nisësh “motër” vallen duhet të dish ta mbash... ose hyr në kurs të shotes a në ndonjë vend dhe mëso. Vetëm nëse të intereson. Mos hidh kështu kunjash 50- centëshe, se ka mundësi që as nuk i duhet njeriu çfarë je duke bërë ti, sa para ke bërë, sa follower- sa e sa koncerteke, do t’i kisha bërë edhe unë po s’kam ca të nxjerr. Kështu që ulu me këmbë në tokë o rrush se të ka rënë fama në kokë. Si më e madhe që jam po të këshilloj se nuk është edhe aq e vështirë.”
Sërish vazhduan thumbimet në studion e “Xing me Ermalin”, ku Tayna u shpreh se “Olimpia është këngëtarja më e mirë që ka pasur ndonjëherë Ermali. Ka edhe belin e hollë.”
Gjithë këtyre kunjave sa andej-këndej, iu bashkua edhe Arta Memedi, që në fillim “e nisi me thumbime të largëta”, derisa shpërtheu në mënyrë të drejtpërdrejtë.
Kush po dëmton kë?: E gjithë kjo po ndikon shumë pozitivisht tek Tayna, që pavarësisht detajeve dhe kunjave, çdo gjë po shkon në favorin e saj. Siç shprehet edhe gazetari Nderim Neziri në emisionin “Mirage”, asnjë nuk po e dëmton Tayna-n: “Ajo po ia shikon hajrin suksesit. Po qesh me hite.”
Ndër të tjera, Neziri shton se Fifi është një këngëtare shumë e mirë profesionalisht, e cila duke u marrë me të tilla ngjarje, duket se deri-diku po e minimizon figurën e saj". Për të tjera detaje, mund të ndiqni videon:
