Ish-presidenti Joe Biden është duke ndjekur një tjetër qasje për të përballuar betejën me një formë agresive të kancerit të prostatës. Ai është duke u trajtuar me terapinë me rrezatim dhe me hormone.
“Si pjesë e planit të trajtimit për kancerin e prostatës, presidenti ish-Joe Biden po i nënshtrohet aktualisht terapisë me rrezatim dhe trajtimit me hormone,” tha zëdhënësi i tij për NBC News në një deklaratë.
Trajtimi me rrezatim pritet të zgjasë pesë javë dhe shënon “një fazë të re për kujdesin e tij”, tha gjithashtu një burim për mediat, duke shtuar se Joe tashmë ka filluar të marrë edhe ilaçe hormonale në formë pilule. Ekipi i tij tha për The Post se ish-presidenti po ndihet më mirë.
Muajin e kaluar, zëdhënësi i politikanit konfirmoi se ai iu nënshtrua një operacioni për të hequr qeliza kancerogjene nga lëkura.
Joe Biden, 82 vjeç, u diagnostikua me një “formë agresive” të kancerit të prostatës në maj.
“Presidenti Joe Biden u vizitua për një nodul në prostatë pas shfaqjes së simptomave,” thuhej në deklaratën e zyrës së tij personale, duke shtuar: “Ai u diagnostikua me kancer të prostatës, i karakterizuar nga një rezultat Gleason prej 9 (Grupi i Gradës 5) me metastaza në kocka”. Kjo do të thotë se kanceri është përhapur në kocka.
“Megjithëse diagnostikimi përkon me një formë më agresive të sëmundjes, kanceri duket të jetë i ndjeshëm ndaj hormoneve, gjë që lejon një menaxhim efektiv,” shtohej në deklaratë.
Në atë kohë, Joe shkroi në Instagram: “Kanceri na prek të gjithëve. Ashtu si shumë prej jush, unë dhe Jill (e shoqja) kemi mësuar se jemi më të fortë në vendet ku jemi thyer. Faleminderit që na ngrini humorin me dashuri dhe mbështetje.”
Beteja me kancerin në familjen e ish-presidentit amerikan nuk është e panjohur, pasi djali i Joe, Beau Biden, ndërroi jetë nga kanceri në tru në vitin 2015.
