Nëse keni qenë aktivë në rrjetet sociale ditët e fundit, ka shumë mundësi që të keni parë imazhe të krijuara nga Inteligjenca Artificiale që imitojnë stilin ikonik të Studios Ghibli.

Studioja Ghibli është kompania japoneze e animacionit që ka krijuar filmat klasikë si “Spirited Away”, “My Neighbor Totoro” dhe “Howl's Moving Castle”.

Falë një versioni të ri të ChatGPT-së, përdoruesit mund të transformojnë memet e njohura të internetit ose fotot personale në stilin e veçantë të bashkëthemeluesit të Ghibli-t, Hayao Miyazaki.

Miyazaki, 84 vjeç, i njohur për qasjen e tij të vizatimit me dorë ndaj krijimeve të çuditshme dhe surreale, ka kritikuar rolin e Inteligjencës Artificiale në animacion. Një nga rastet më të famshme ishte në një dokumentar të vitit 2016 të titulluar “Never-Ending Man: Hayao Miyazaki”.

Në dokumentar, një grup krijuesish i treguan Miyazaki-t një provë animacioni të krijuar nga Inteligjenca Artificiale të një mumjeje që ishte ideuar për një videolojë. Personi që demonstronte animacionin, shpjegoi se IA mund të "na paraqiste lëvizje qesharake dhe jashtë normales që ne njerëzit nuk mund t'i imagjinojmë".

Kjo e shtyu Miyazakin të tregonte një histori.

“Çdo mëngjes, jo ditët e fundit, shoh mikun tim me aftësi të kufizuara,” tha ai.

"Është kaq e vështirë për të që të të japë dhe dorën; krahu i tij me muskuj të ngurtë nuk mund të shtrijë dorën. Tani, duke menduar për të, nuk mund t'i shikoj këto gjëra dhe të më duken interesante."

Miyazaki shtoi:

"Kushdo që krijon këto gjëra nuk e ka idenë se çfarë është dhimbja. Unë jam krejtësisht i neveritur. Do doja që të mos shpresonim kurrë të përdornim këtë formë animimi. Unë ndjej se kjo është një fyerje për vetë jetën."

Kjo nuk është hera e parë që IA e frymëzuar nga Studio Ghibli ka shkaktuar polemika.

Në tetor, një trailer i filmit “Princess Mononoke” i krijuar nga IA shkaktoi reagime pasi u bë virale në rrjetet sociale. Traileri i atij versioni, i cili përdor zërin e dublantëve anglezë nga filmi origjinal i 1997-ës, ka riimagjinuar plotësisht animacionin e vizatuar me dorë të filmit japonez sikur pjesët të luheshin nga njerëz të vërtetë.

Artikuj të sugjeruar:

^{Burimet: Associated Press, The Independent}