Dëshira e shqiptarëve për të ikur jashtë vendit është e madhe ndaj sapo u jepet mundësia e parë, vështirë se e mendojnë dy herë. Arsyet mund të jenë nga më të ndryshmet për gjithkënd, por parësorja është sigurisht për një jetë më të mirë.

INSTAT njofton se sipas anketës së Forcës së Punës 2017, arsyeja kryesore e largimit nga Shqipëria është “Mundësi punësimi” me 84,0 % të përgjigjeve. Bashkimet familjare ose arsye të tjera që lidhen me familjen janë shkak për emigracionin në masën 4.6%, ndërsa 3.6 për qind e të larguarve nga vendi janë për qëllime studimi.

Nisur nga kjo, INSTAT vëren se emigrimi ishte arsyeja kryesore për rënien e popullsisë në Shqipëri para vitit 2001 dhe në periudhën 2001-2011.

Por një studim i muajve të fundit i Qendrës për Kërkime Sociale dhe Ekonomike për Potencialet e Emigrimit tregon rreth një tendence të lartë të ikjes nga vendi të familjeve me të ardhura të larta. Pavarësisht se dëshira për migrim vërehet tek të gjitha grupet shoqërore, ajo nuk është më një karakteristikë vetëm e grupeve të varfra të shoqërisë shqiptare. Vrojtimi i ndau të anketuarit në 10 grupe të mëdha, duke u bazuar në të ardhurat mujore ose vjetore të familjes së tyre . Të dhënat e anketës tregonin se migrimi potencial ishte më i lartë te familjet që e karakterizonin gjendjen financiare si “fare e pamjaftueshme”, e “pamjaftueshme”.

Anketimi i vitit 2018 gjeti se rreth 55% familjeve që kishin të ardhura ndërmjet 1000-1400 eurove donin të iknin. Gjithashtu, në këto përmasa, kërkojnë të ikin edhe personat me paga 470 deri në 950 euro në muaj. Nga ana tjetër, shihet se më pak se 50% e personave me paga nën 370 euro planifikojnë gjithashtu të largohen.

Burimi: Monitor