Durrës: Pretendohet se është përdhunuar një turiste 18-vjeçare; policia arreston të dyshuarin
Një adoleshente italiane 18-vjeçare ka denoncuar një djalë 26-vjeçar, pasi pretendon se ai e ka përdhunuar në shezlongët e plazhit të Durrësit. Sipas policisë, e cila arrestoi të dyshuarin, i riu ka precedent kriminal, pasi është dënuar më parë për vjedhje dhe armëmbajtje pa leje.
Ngjarja, sipas turistes, ka ndodhur rreth orës 5:25 të mëngjesit, në lagjen “13”.
Dëshmia e saj sipas Euronews: “Gjatë natës kemi qenë me shoqërinë dhe kemi konsumuar edhe pije alkoolike. Për një çast unë jam larguar prej grupit dhe jam ulur në një shezlong që gjendej disa metra larg hotelit. Kjo ka ndodhur rreth orës 05 e 30 minuta afërsisht të mëngjesit të 5 shtatorit. Gjatë kësaj kohe më është afruar një person i cili më ka sulmuar dhe me gjithë tentativat e mia për t’u mbrojtur, më ka përdhunuar pas rezistencës time. Më pas ai është larguar. Unë erdha te juve për të bërë kallëzim lidhur me këtë ngjarje”.
I akuzuari ka pretenduar se ka kryer marrëdhënie seksuale me vajzën, por me dëshirën e saj. Ndërkohë, ajo ka bërë ekzaminimet e nevojshme në spital, ku rezulton se mund të jetë përdhunuar, pasi ka shenja në duar, qafë dhe pjesë të tjera të trupit.
OBSH kërkon që ndihmat në Gaza të jenë gjithëpërfshirëse dhe të qëndrueshme
Tedros Adhanom Ghebreyesus, drejtori i përgjithshëm i Organizatës Botërore të Shëndetësisë (OBSH), ka bërë apel për dërgesa më të qëndrueshme, të sigurta dhe gjithëpërfshirëse në Gaza. Ndihma duhet të konsistojë jo vetëm me ushqime, por edhe me ilaçe.
Në një postim në X, ai shprehu shqetësimin për krizën e thellë humanitare që ka shkaktuar uri në Gaza, për shkak të sulmeve të Izraelit dhe moslejimit të depërtimit të kamionëve me ndihma. Ghebreyesus përsëriti gjithashtu thirrjen për ndihma ndërkombëtare.
Britani e Madhe: Dorëhiqet zëvendëskryeminsitrja
Angela Rayner është dorëhequr nga detyra e saj si zëvendëskryeminstre, pas një skandali tatimor, i cili lidhet me mospagimin e taksave për apartamentin e saj. Dorëheqja e saj shërbeu si shkak për riorganizimin e kabinetit qeveritar dhe në vend të saj u vendos David Lammy, i cili do të luajë rolin e zëvendëskryeministrit të ri, si dhe sekretarit të Drejtësisë.
“Është nderi i jetës sime që të emërohem Zëvendëskryeministër, Lord Kancelar dhe Sekretar i Drejtësisë nga Keir Starmer. Që kur isha i ri dhe u rrita në Tottenham, kam qenë i vendosur të ndihmoj që ky vend të jetë më i drejtë, më i sigurt dhe më i mirë”, u shpreh David Lammy në deklaratën e tij të parë pas emërimit, duke shprehur edhe elozhe për paraardhësen e tij.
Ushtria izraelite paralajmëron palestinezët që të largohen nga Gaza
Ushtria izraelite u ka bërë thirrje banorëve të Gazës që të largohen nga zona më e madhe e qytetit, pasi do të vijojnë me ofensivën e tyre. Vendimi u mor nga Benjamin Netanyahu, i cili u shpreh se synon të marrë totalisht qytetin, pasi është “qendra e Hamasit”.
Sulmet e ushtrisë do të rrezikojnë sërish jetën e mijëra palestinezëve, të cilëve u është kërkuar të largohen në jug të vendit, duke u garantuar atyre strehim, ushqime dhe ilaçe.
Netanyahu, pavarësisht kundërshtimeve të shumta nga liderët botërorë, thirrjeve se po shkakton gjenocid dhe apeleve të vazhdueshme, sërish vijon me planin e tij për zhdukjen e Hamasit, pas sulmit në tetor të vitit 2023.
