Studimet e fundit kanë treguar se së shpejti një test urine, që mund të bëhet në shtëpi, do të zëvendësojë Pap Testin, test që bëhet duke marrë kampione qelizash nga qafa e mitrës me anë të një furçe të posaçme pa shkaktuar dhimbje. Më pas kampionet dërgohen për t’u ekzaminuar në laborator.
BBC raporton se studiues të Queen Mary University në Londër u kërkuan 600 grave, te të cilat ishin gjetur qeliza anormale, të vetë-ekzaminonin urinën përmes një testi në shtëpi, detajet e të cilit nuk janë bërë ende publike.
Testi arriti të identifikonte qartë qelizat anormale në 96% të rasteve.
Studiuesit u shprehën pozitivë në lidhje me situatën pasi testi në fjalë identifikon ndryshimet në ADN të shkaktuara nga virusi HPV (Human Papilloma Virus).
Kanceri i qafës së mitrës është kanceri i dytë më i zakonshëm te gratë, veçanërisht në vendet në zhvillim, një sëmundje tërësisht e parandalueshme e megjithatë, mbetet shkak i rëndësishëm i vdekjes nga kanceri te gratë në mbarë botën.
Cilat gra janë më të rrezikuara?
Çdo grua mund të jetë në rrezik për kancer të qafës së mitrës, por një femër është më e rrezikuar për t’u prekur nëse:
- Ka filluar herët marrëdhënien e parë seksuale
- Ka partnerë seksual të shumtë
- Ka partnerë të cilët kanë apo kanë patur shumë partnere seksuale
- Ka apo ka patur një infeksion seksualisht të transmetueshëm
- Përdor në mënyrë abuzive duhanin
- Ka imunitet të ulët (p.sh. individë të infektuar me HIV janë në rrezik më të lartë për t’u infektuar me HPV, dhe mund të infektohen nga lloje të ndryshme të HPV-së)
Cilat janë shenjat kryesore?
- Gjakderdhje jo të rregullt midis cikleve menstruale, ose gjakderdhje jonormale vaginale pas marrëdhënieve seksuale
- Dhimbje mesi apo në fund të barkut
- Lodhje, humbje peshe dhe oreksi
- Parehati vaginale ose sekrecione vaginale jonormale
- Dhimbje gjatë kontaktit seksual
Për më shumë informacion, klikoni këtu.
