Institucioni i martesës ka pësuar ndryshime të rëndësishme me kalimin e kohës. Në të kaluarën, martesa shihej shpesh si një domosdoshmëri për krijimin e një familjeje dhe për sigurinë financiare të burrit dhe gruas. Në shumë kultura, ajo ishte gjithashtu një mënyrë që individët të fitonin një status më të mirë social, si dhe të përmbushnin detyrimet e tyre fetare.
Sikurse mund ta dini tashmë, vitet e fundit ka patur një rënie të numrit të martesave në shumë vende të botës. Kjo i atribuohet një sërë faktorësh, përfshirë ndryshimet në qëndrimet sociale, mundësitë më të mëdha për arsim, më shumë mundësi për zhvillimin e grave etj.
Si rezultat i këtyre ndryshimeve, institucioni i martesës ka evoluar dhe është bërë më pak i përhapur në shumë shoqëri. Ndërsa martesa është ende një pjesë e rëndësishme e shumë kulturave dhe feve, ajo nuk shihet më si e vetmja apo mënyra më e mirë që individët të krijojnë marrëdhënie afatgjata dhe të përkushtuara. Në shumë raste, çiftet zgjedhin të bashkëjetojnë ose të kenë fëmijë pa u martuar dhe rolet dhe pritshmëritë tradicionale që lidhen me martesën kanë ndryshuar.
Pse të martohemi?
Ka shumë arsye të ndryshme pse njerëzit zgjedhin të martohen. Disa nga më të zakonshme janë këto:
Dashuria - Për shumë njerëz, arsyeja kryesore për t'u martuar është dashuria. Ata kanë rënë në dashuri me dikë dhe duan të kalojnë pjesën tjetër të jetës me atë person.
Ndjenja e sigurisë - Martesa mund të sigurojë një ndjenjë mbështetjeje afatgjatë. Kur dy njerëz martohen, supozohet se ata do të jenë krah njëri-tjetrit në ditët më të mira dhe më të këqija. Kështu, martesa na jep një ndjenjë sigurie emocionale dhe financiare, na ofron stabilitet dhe një ndjenjë përkatësie.
Fëmijët - Shumë njerëz zgjedhin të martohen sepse duan të kenë fëmijë dhe të krijojnë familje. Martesa mund të sigurojë një mjedis të qëndrueshëm për rritjen e tyre.
Normat sociale - Në shumë kultura, martesa shihet si një normë shoqërore dhe një mënyrë për të treguar se tani je “i rritur” apo “ke moshën”. Disa njerëz mund të martohen për këtë arsye, edhe nëse nuk janë të dashuruar me partnerin e tyre.
Feja - Për disa njerëz, martesa është një rit i rëndësishëm fetar dhe një mënyrë për të përmbushur besimet e tyre shpirtërore.
Pse të mos martohemi?
Ndërsa martesa mund të jetë një përvojë e mrekullueshme dhe përmbushëse për shumë njerëz, nuk është e duhura për të gjithë. Për disa individë, këto janë disa nga arsyet pse martesa mund të mos jetë vendimi më i mirë:
Liria personale - Martesa kërkon një angazhim të konsiderueshëm të kohës, energjisë dhe burimeve. Mund të përfshijë gjithashtu heqjen dorë nga liria e plotë dhe autonomia personale. Disa njerëz thjesht nuk janë të gatshëm të përmbushin "sakrificat” e kërkuara nga martesa.
Përputhshmëria - Që një martesë të jetë e suksesshme, është e rëndësishme që të dy individët të bien në dakord kur bëhet fjalë për vendime të rëndësishme. Nëse dy njerëz kanë vlera, qëllime ose interesa shumë të ndryshme, mund të jetë e vështirë për ta të ndërtojnë një marrëdhënie të fortë dhe të qëndrueshme.
Problemet e marrëdhënieve - Çdo marrëdhënie ka sfidat e veta dhe martesa nuk bën përjashtim. Nëse një çift ka probleme në lidhje me besimin mes tyre apo komunikimin, martesa apo zyrtarizimi i lidhjes nuk mund t’i zgjidhë ato probleme. Përkundrazi, thjesht sa do t’i përkeqësojë.
Pritshmëritë shoqërore - Në disa raste, individët mund të ndjejnë presion për t'u martuar nga familja, miqtë ose shoqëria në përgjithësi. Nëse ata nuk janë gati ose thjesht nuk duan të martohen, ky presion mund të jetë stresues dhe i vështirë për t'u përballuar.
Financat - Martesa mund të jetë e shtrenjtë, veçanërisht nëse një çift vendos të bëjë një dasmë të madhe apo të bashkëjetojë. Për disa individë, kostoja e martesës mund të mos ia vlejë, veçanërisht nëse janë të kënaqur me gjendjen e tyre aktuale.
Është e rëndësishme që individët të marrin parasysh me kujdes nevojat, dëshirat dhe rrethanat e tyre përpara se të vendosin nëse martesa është zgjedhja e duhur për ta. Akoma më e rëndësishme është që zgjedhjet tona të respektohen dhe ne të respektojmë zgjedhjet e të tjerëve.
Burimi: Pure Wow, Psychology Today
