Çfarë prindërit po bëjnë sot është e paprecedentë. Brezi i tanishëm dhe ai përpara tyre, u lindën në një botë të përparuar teknologjikisht dhe nuk e njohin jetën ndryshe. Si prindërit vendosin të trajtojnë marrëdhënien fëmijë-teknologji, mund ta ndikojë fëmijën e tyre për tërë jetën dhe nuk ekziston një zgjidhje shabllon. T’i mbash fëmijët larg teknologjisë është thuajse e pamundur. T’i lësh gjithë kohës në kontakt me teknologjinë s’është e shëndetshme. Ç’duhet bërë?
Më poshtë, shtatë strategji për të përballuar epoën e re të ekranit.
Mikpriteni. Teknologjia do të jetë kryefjala e jetëve tona për goxha kohë dhe fëmijët tanë duhet të mësojnë aftësi që u nevojiten. Të prindërosh në kohë të tilla nuk do të thotë t’i kufizosh nga teknologjia, por t’u mësosh si ta përdorin si duhet. Prindërit duhet të kenë gjithmonë parësi t’u mësojnë fëmijëve si ta shfrytëzojnë laptopin/celuarin/tabletin në maksimumin e potencialit.
Moderimi është çelësi i gjithçkaje. Ne vërtetë nuk dimë si do të jetë e ardhmja e fëmijëve të rritur para ekranit, por dimë gjëra të tjera. Përshembull, studimet kanë zbuluar se përdorimi i tepruar i pajisjeve teknologjike sjell probleme me përqëndrimin, vëmendjen, shkollën, gjumin dhe të ushqyerit. Prindërit duhet t’i monitorojnë fëmijët e tyre qoftë në përmbajtje, qoftë në kohëzgjatje.
Ndiqni rregullat. Dikush duhet të jetë minimalisht 13 vjeç për të hapur një llogari në Instagram ose Facebook dhe ky rregull duhet respektuar. Deri sa të arrijnë një farë pjekurie, më mirë t’i qëndrojnë larg botës së rrjeteve sociale, e cila shpeshherë është toksike për vetë të rriturit.
Bisedat në person mbeten të rëndësishme. Teknologjia e sotme po ndryshon rrënjësisht mënyrën si ne komunikojmë, por në asnjë mënyrë kjo nuk do të thotë se do të ndalojmë së foluri në person. Krijoni mundësi që fëmijët tuaj të formojnë aftësi shoqërore, të mësojnë të komunikojnë.
Teknologjia mund të konsumohet ose të përdoret. Fëmijët tanë mund të rrinë në Facebook, ose ta përdorin për të ndërtuar komunitete. Mund të luajnë lojëra, ose mund të ndërtojnë të tilla.
Pëlqimet dhe komentet nuk ju bëjnë njerëz më të mirë ose më të këqinj. Janë thjesht numra dhe fjalë në një ekran. Është e rëndësishme që fëmijët tanë të kuptojnë se vlera e tyre gjendet tjetërkund, tek veprime që u kënaqin shpirtin dhe zemrën.
S’mund të besosh çdo gjë që lexon në internet. Kjo s’ka nevojë për shumë koment. Kur çdokush mund të postojë çdo gjë, asgjë s’ka besueshmëri.
