“Një nënë në qytetin e Troy- t, pa patur asnjë dosje kriminale u dëbua në Shqipëri në pamundësi për t’u ndarë me tre fëmijët e saj dhe bashkëshortin.” kështu nis shkrimi në “Detroit Free Press”.
Bëhet fjalë për shqiptaren Cile Precetaj, rasti i së cilës ka pushtuar disa herë faqet e mediave për shkak se që në 2005- ën rrezikonte dëbimin nga SHBA-ja, ndonëse është e martuar dhe ka tre fëmijë me nënshtetësi amerikane, djalin 16- vjeçar dhe 2 vajza, përkatësisht 8 dhe 10 vjeç.
Familja ka deklaruar po për “Detroit Free Press” se e ka mësuar çka ndodhur me Cilen vetëm kur ajo i ka marrë nga Gjermania dhe u ka thënë se po e dërgonin në Shqipëri.
“Fëmijët e mi janë të shkatërruar. Nuk ndalojnë së qari. Më thanë se ky nuk është shteti që u mësojnë në shkollë.” u shpreh bashkëshorti, Pete Gojcaj një imigrant nga ish- Jugosllavia, i cili jeton në SH.B.A prej 30 vitesh dhe zotëron një restorant të tijin.
Nisur nga ç’thuhet në mediat amerikane, 46- vjeçarja shkoi në Amerikë për një jetë më të mirë, pas disa problemeve serioze që pati në Shqipëri në vitin 2000. Ajo tentoi të fitonte statusin e azilantes politike, një kërkesë që iu hodh poshtë në vitin 2005.
Një vit më vonë, e njëjta kërkesë u rrëzua sërish, kështu që pas humbjes së gjyqit u dha urdhri që Cilja të kthehej mbrapsht në Shqipëri. Por një sërë kërkesash dhe peticionesh bënë të mundur që Cilja të qëndronte. Derisa më 26 prill të këtij viti ajo u arrestua dhe më 16 maj u nis drejt Shqipërisë, pa patur mundësi të takonte fëmijët dhe bashkëshortin.
“Lutuni të gjithë për ne. Ne s’kemi bërë asnjë krim.” ka deklaruar i pikëlluar bashkëshorti.
