Beatriçe Gjergji dhe Kolë Laca përshkruan emocionet e tyre pas performancës në gjysmëfinalen e parë të Eurovision 2025 dhe ndjesinë e veçantë që përjetuan kur u kualifikuan për në finale.

Në një intervistë të shkurtër për platformën WiwiBloggs, Beatriçe u shpreh plot gëzim: “Jemi shumë të lumtur. Ishte një ndjesi e mrekullueshme të shihje aq shumë njerëz që të jepnin fuqi. Ishte e bukur, e paharrueshme.” Ajo shprehu mirënjohje për energjinë që morën nga publiku dhe emocionin që e përjetoi në çdo sekondë të performancës.

Ndërkohë, Kolë Laca, në një mesazh drejtuar veçanërisht publikut shqiptar, falënderoi ata që i mbështetën: “Faleminderit të gjithë shqiptarëve që na kanë votuar, se e dimë që na keni votuar të gjithë. Të vazhdojmë kështu deri në fund.”

Performanca e Beatriçes dhe Kolës u karakterizua nga një ndërthurje e fuqishme mes vokalit të fuqishëm, emocionit të sinqertë dhe elementëve autentikë shqiptarë që u reflektuan si në skenografi ashtu edhe në prezencën e tyre artistike. Ky kombinim bëri që ata të veçoheshin mes shumë konkurrentëve.

Kualifikimi i Shqipërisë në finalen e madhe është një ogur i mirë për suksesin e mundshëm të dyshes në finale. Tashmë sytë janë drejt së shtunës, më 17 maj, kur do të mbahet finalja e Eurovisionit 2025 dhe ku Beatriçe dhe Kola do të kenë mundësinë të ngjiten në skenë edhe një herë për të përfaqësuar Shqipërinë në mënyrë dinjitoze.