Shkodra Elektronike, e cila do të përfaqësojë denjësisht Shqipërinë në Eurovision, ka folur për përvojën e saj në këtë garë të rëndësishme. Në një intervistë për RTSH, Beatriçja dhe Kola u shprehën se njerëzit janë mahnitur me gjuhën tonë, çka konfirmon se muzika nuk ka nevojë që ta kuptosh një gjuhë specifike, por e kuptojnë emocionin.

“Jashtë shtetit njerëzit kanë mbetur të mahnitur me mënyrën se si tingëllon gjuha jonë. Kjo konfirmon se me melodinë, muzikën dhe me një radhitje shumë të bukur, krijohen emocione, pa kuptuar fjalë, tregojnë emocionet. Kjo është gjëja e bukur e Eurovision-it, kemi për të dëgjuar shumë gjuhë, edhe tonën dhe jemi shumë të kënaqur”, u shpreh Beatriçja.

Kola, nga ana tjetër, tha se të huajve u pëlqejnë elementet etnike dhe tribale të këngës:

“Të huajve u ka ngjitur kjo këngë. U pëlqen fakti që ka një element etnik, tribal, që është çiftelia, por edhe ritmika. Me tarabuk është bërë, me tarabuk elektronik”.

Ata rrëfyen se pas provës së parë morën komplimente:

“Ne shohim që njerëzve u pëlqen kjo këngë. Funksionon me një fjalë. Mbas provës së parë sinqerisht na bënë komplimente tërë ata teknikë, ata që ishin aty”, tha Kola, ndërsa Bea vijoi: “sinqeriteti, fati, momenti dhe ndoshta ndonjë ndihmë prej lart. Kam filluar ta besoj këtë gjë!”.

Beatriçja gjithashtu u shpreh se i ndjen shumë fjalët e tekstit të këngës dhe se i ka zgjedhur nga shpirti kur i ka shkruar:

“Janë fjalë të ndjera. Unë i ndiej ato fjalë. I kam zgjedhur nga shpirti im kur i kam shkruar. Është e pabesueshme për mua sot që të shoh njerëz, që nuk janë shqiptarë, duke kënduar ato vargje”.

Ajo u shpreh se është rritur larg vendit dhe është e pabesueshme, por edhe shumë e bukur në jetën e saj.

“Kjo që na ka ndodhur është krejt e veçantë, sepse ne gjithë jetën kemi jetuar thjesht dhe kemi bërë se çfarë kemi qejf, për të gëzuar shpirtin tonë. Tani që e gjejmë veten në këtë pozicion, për të përfaqësuar Shqipërinë, unë që jam rritur jashtë shtetit, larg prej tokës sonë…s’e di, është zjerm tepër i fortë. Ndonjëherë e ndiej veten të vogël para këtij zjermi, por është gjë shumë e bukur”, tha ajo.

Shkodra Elektronike është pëlqyer shumë nga fansat e Eurovision-it dhe renditet në vende bindëse në shumë sondazhe të kryera nga Eurovision. Njerëzit dhe vetë grupi janë shumë entuziastë për pjesëmarrjen. 

Sa i përket paraqitjes në skenë, kostumet e Beas dhe Kolës janë krijuar nga e ëma e Beatriçes, stilistja Irina Dema, në bashkëpunim me markën “Tamel Clothes”.

Artikuj të sugjeruar: