Një oborr i stilit mbretëror; zonja me tabaka në dorë; pishina e jakuzzi; pasqyra dhe shandanë të stilit barok… Vila e Behgjet Pacollit të kujton pamje nga filmat me mbretër e fisnikë. Dhe në fakt, këtë ka dashur ai të arrijë kur e dizenjoi, vetë, këtë vilë neoklasike.
‘Unë udhëtoj nëpër botë, dhe shoh objekte të bukura të viteve 1700-1800.’, ka thënë Pacolli për Jo Vetëm Modë, ‘Ato objekte mbeten gjithmonë pika referuese të atyre qyteteve, dhe kam dashur gjithmonë t’ia fal edhe Kosovës diçka të tillë’ Pacolli ka thënë se kjo ndërtesë madhështore nuk është vetëm shtëpia e tij, por edhe ‘e fëmijëve, miqve, dhe mysafirëve’ të tij.
Ai ka rrëfyer se tradita ka qenë një element i rëndësishëm i shtëpisë, ndaj edhe ‘oda’-dhoma e miqve apo mysafirëve- është ndërtuar jashtë shtëpisë. ‘Jo se këtu brenda nuk kam pasur vend, por kam dashur të ndjek traditën, duke ndërtuar një hapësirë të posaçme ku të mund të mblidhet e gjithë familja’- ka thënë ai për odën gjigande të miqve (foto 6)
Për arkitekturën dhe dizajnin, ai thotë se ka ndërthurur stilin neoklasik me atë modern, por edhe me elemente të kuruara të stilit klasik për të mos e ngarkuar së tepërmi. ‘Kam dashur të krijoj një ambjent të ngrohtë, të rehatshëm, jo refuzues. Dhe ajo që është më e rëndësishmja: është një ambjent funksional’.
Behgjet Pacolli është, me gjasë, shqiptari më i pasur në botë. Ai ka lindur në një familje të varfër, ka studiuar më pas në Gjermani e tani është president i një kompanie të madhe ndërtimi në Zvicër. Pacolli është përmendur shpesh gjatë viteve të fundit në politikë, si president i Kosovës për një kohë të shkurtër e më pas, si zëvendës kryeministër i Hashim Thaçit.
