Një burrë polak është arrestuar pas pretendimeve se ishte i gatshëm të spiunonte për inteligjencën ushtarake ruse, në një plan të dyshuar për një atentat ndaj Volodymyr Zelensky, presidentit ukrainas. Prokurorët e Polonisë kanë bërë me dije se shtetasi polak dyshohet se ka dhënë informacione tek inteligjenca e Rusisë dhe ka shërbyer si ndihmë për forcat speciale ruse, që të planifikonin një atentat të mundshëm kundrejt presidentit ukrainas.
Autoritetet polake kanë thënë se i dyshuari deklaroi se ishte i gatshëm të veprojë për shërbimet e inteligjencës ushtarake të Rusisë, madje edhe të vendosë kontakte me qytetarët rusë, të cilët janë të përfshirë në mënyrë direkte në luftën në Ukrainë.
Personi pritej të transmetonte informacion të detajuar në lidhje me aeroportin Rzeszów-Jasionka, në juglindje të Polonisë, pranë kufirit me Ukrainën. Ky territor shërben si porta kryesore për furnizimet ndërkombëtare ushtarake dhe humanitare për Ukrainën, si dhe për lëvizjen e udhëheqësve dhe politikanëve që udhëtojnë brenda dhe jashtë Ukrainës. Ky aeroport kontrollohet dhe mbrohet nga trupat amerikanë.
Arrestimi erdhi si rezultat i një bashkëpunimi të ngushtë me shërbimet e sigurisë në Ukrainë, të cilët dhanë informacionet vendimtare. Nëse polaku shpallet fajtor, ai do të përballet me 8 vite burg.
Andriy Kostin, kryeprokurori ukrainas, u shpreh se i dyshuari ishte ngarkuar me rolin e mbledhjes dhe transmetimin e informacionit të Rusisë, në lidhje me sigurinë në aeroportin “Rzeszów-Jasionka”. Për momentin, ai ndodhet në paraburgim, në pritje të procedurave gjyqësore.
"Ky rast nënvizon kërcënimin e vazhdueshëm që Rusia paraqet jo vetëm për Ukrainën dhe ukrainasit, por për të gjithë botën e lirë," shkroi Kostin në X. "Regjimi kriminal i Kremlinit organizon dhe kryen operacione sabotuese në territorin e shteteve të tjera sovrane”, shtoi mandej ai.
Edhe dy persona gjermano-rusë janë arrestuar në Gjermani, pasi dyshohen për spiunazh. Një prej tyre akuzohet se ka dakordësuar të kryejë sulme ndaj caqeve potenciale, duke përfshirë edhe ndërtesat amerikane, me qëllim që të sabotohet ndihma për ukrainën. Të dyshuarit, Dieter S. dhe Alexander J., u arrestuan ditën e mërkurë në Bavari.
Sipas prokurorëve, Dieter S. kishte folur për akte të mundshme sabotuese me një person që ishte lidhur me inteligjencën ruse. Komunikimi kishte nisur që nga tetori dhe roli i Dieter ishte që të kontribuonte në minimin e mbështetjes që Gjermania po i jep Ukrainës. Dieter kishte rënë dakord që të kryente sulme me bomba dhe të vinte zjarre të qëllimshme në infrastrukturat që përdor ushtria në ndërtesat industriale në Gjermani.
