Të enjten u njoftua se të gjithë personat në bordin e nëndetëses Titan kishin humbur jetën si pasojë e një shpërthimi. Pesë burra vdiqën në ekspeditën turistike në rrënojat e Titanikut.
“E di që ka shumë pyetje se si, pse dhe kur ndodhi shpërthimi. Këto janë pyetje për të cilat do të mbledhim sa më shumë informacion që të mundemi tani,” tha John Mauger, administrator i Rojes Bregdetare Amerikane.
Ai shtoi se ishte një “rast kompleks” që ndodhi në një pjesë të largët të oqeanit dhe përfshinte njerëz nga disa vende të ndryshme.
Të enjten, pas ditësh kërkimesh ajrore dhe nënujore, një mjet zhytës robotik i vendosur nga një anije kanadeze zbuloi një fushë mbeturinash të nëndetëses, 488 metra nga rrënojat e Titanikut.
Viktimat janë Stockton Rush, drejtori ekzekutiv dhe themeluesi i OceanGate, krijuesi i Titan dhe kompania që kryente ekspeditat, sipërmarrësi i njohur Shahzada Dawood, djali i tij, Suleman, biznesmeni dhe eksploruesi britanik, Hamish Harding, dhe zhytësi Paul-Henry Nargeolet.
Homazhet për viktimat dhe lavdërimet për ekipet e shpëtimit u përhapën në të gjithë botën.
Nëndetësja turistike bënte ekspedita të ndryshme në rrënojat e Titanikut, të cilat ndodhen 3,800 metra nën nivelin e detit, por diçka shkoi keq dhe ajo u zhduk së bashku me turistët në bord, pa lënë asnjë gjurmë.
Nicolai Roterman, një ekolog dhe lektor i biologjisë detare në Universitetin e Portsmouth, Angli, tha se zhdukja e nëndetëses nxjerr në pah rreziqet dhe të panjohurat e turizmit në det të thellë.
“Edhe teknologjia më e besueshme mund të dështojë dhe për këtë arsye do të ndodhin aksidente. Me rritjen e turizmit në det të thellë, ne duhet të presim më shumë incidente si ky,” tha ai.
Sipas ekspertëve të industrisë dhe ish-pasagjerëve, ekspedita e Titan ishte jashtëzakonisht e rrezikshme për shkak të thellësisë së oqeanit.
