Kryeqyteti i mbretërisë konservatore islame nuk njihet zakonisht si një vend ku çiftet që udhëtojnë nëpër botë vijnë për të festuar romancat e tyre. Dhjetë vite më parë, policia fetare patrullonte rrugët e qytetit për të ndaluar çiftet e pamartuara dhe për t’i bërtitur grave që të mbulonin flokët. Marrëdhëniet seksuale jashtë martese ishin, deri së fundmi, të dënueshme me rrahje me kamxhik.
Nuk ishte aspak surprizë që lajmi i fejesës së Cristiano Ronaldos, yllit botëror të futbollit, u shoqërua me një foto të një unaze diamanti sa një ulli gjigant. Por vendndodhja e shënuar në postimin e Instagramit nga partnerja e tij prej nëntë vitesh, modelja dhe influencerja Georgina Rodríguez, bëri që shumë njerëz të ngrinin vetullat. Fotoja e dorës së saj me unazë nuk vinte nga Parisi, Bora Bora apo Dubai, por nga Rijadi, Arabia Saudite.
Edhe pse fansat u emocionuan për lajmin, ata theksuan faktin se çifti nuk ishte i martuar, pavarësisht se prej dy vitesh jetonte bashkë me fëmijët në këtë qytet saudit.
Rijadi është skena ku një pjesë e historisë së dashurisë së tyre të pamartuar ka zhvilluar kapitujt e saj, pasi Ronaldo u transferua atje në vitin 2022 me një kontratë të majme për të luajtur me klubin Al Nassr. Rodríguez dhe fëmijët iu bashkuan menjëherë. Familja dukej se ishte integruar në një jetë të rehatshme dhe luksoze, duke testuar kufijtë e ndryshimeve të shpejta sociale në Arabinë Saudite.
Që nga viti 2015, princi i kurorës Mohammed bin Salman ka sjellë ndryshime të shumta që e kanë bërë vendin shumë ndryshe nga imazhi i tij ultra-konservator, duke lehtësuar kufizimet sociale, por edhe duke rritur represionin politik.
Dikur, thjesht të ishe në një makinë me një burrë që nuk ishte i afërm, mund të të sillte probleme në postblloqe. Gratë nuk u lejuan t'i jepnin makinës deri në vitin 2018. Sot, rregullat mbeten të paqarta: a lejohet takimi romantik? Bashkëjetesa? Shtatzënia jashtë martese? Nuk ka një kod penal të shkruar dhe gjyqtarët e interpretojnë ligjin islam ndryshe, çka i jep qeverisë fleksibilitet për të manovruar mes ndryshimeve shoqërore, ndonjëherë duke shkaktuar reagime publike ose arrestime të papritura.
Tani, në rrugë mund të shohësh edhe gra me pantallona apo bluzë të shkurtra, pavarësisht se rregullat e veshjes ende i ndalojnë ta bëjnë këtë gjë. Alkooli mbetet i paligjshëm, por tregu i zi lulëzon dhe ndonjëherë të rinj të dehur shihen duke u zënë jashtë klubeve “të thata” të qytetit.
Qendra e Komunikimit Ndërkombëtar e qeverisë saudite nuk iu përgjigj pyetjes nëse seksi dhe bashkëjetesa jashtë martese janë aktualisht të lejuara apo nëse Ronaldo, 40 vjeç, ka marrë ndonjë përjashtim. As përfaqësuesit e çiftit nuk komentuan nëse rrethanat sociale të Arabisë Saudite ndikuan në vendimin për t’u fejuar.
Transferimi i Ronaldo-s ishte një fitore e madhe për strategjinë e Arabisë Saudite për të zgjeruar sektorin e sportit dhe për të përmirësuar imazhin e vendit. Ai ka postuar shpesh nga jeta dhe futbolli në Arabinë Saudite, duke treguar një anë tjetër të vendit.
Rodríguez, 31 vjeçe, modele dhe influencuese me një dokumentar në Netflix, ka qenë pjesë e kësaj paraqitjeje, nga tapetët e kuq, në pushimet me bikini jashtë vilës së tyre, deri te vizitat në resorte luksoze me fëmijët.
Megjithatë, për gratë e tjera në vend, pa certifikatë martese nuk ka akses në kujdes shëndetësor, arsim ose dokumente ligjore për fëmijët, e as mundësi për t’i regjistruar ata.
Ronaldo e ka përmendur disa herë publikisht Georgina-n si “bashkëshorte”, ndërsa në dokumentarin e saj në Netflix, ai ka thënë se do të martohen “një ditë”.
“Gjithmonë i them: ‘Kur të ndjejmë atë klikun,’” u shpreh ai atëherë.
Nuk dihet saktësisht kur ose ku ndodhi propozimi. Postimi i Georgina-s në Instagram të hënën ishte thjesht me mbishkrimin:
“Po, pranoj. Në këtë dhe në të gjitha jetët e mia.”
Në komentet poshtë, disa ndjekës arabë bënë shaka se “ishte një fejesë shumë e shpejtë”. Meme-t në arabisht u përhapën menjëherë, me një prej tyre që thoshte se ai duhej të punonte dy vite në Arabinë Saudite për të përballuar martesën. Një tjetër meme e përshkruante periudhën e bashkëjetesës si “fazën e njohjes”, duke ironizuar zakonet tradicionale të njohjes para martesës.
Në qershor, Ronaldo rinovoi kontratën në Arabinë Saudite për edhe dy vite të tjera.
“Familja ime më mbështet gjithmonë në vendimet e mia,” tha ai në një video të publikuar nga klubi. “Populli saudit na trajton shumë, shumë mirë. Prandaj duam të jetojmë këtu dhe ta vazhdojmë jetën tonë këtu.”
Burimi: The New York Times
