Babai i Rihanna-s, Ronald Fenty, ka ndërruar jetë në moshën 70-vjeçare. Lajmi u raportua fillimisht nga stacioni radiofonik “Starcom Network News” në Barbados, vendlindja e këngëtares dhe më pas u konfirmua nga TMZ dhe Page Six.
Burime pranë familjes thanë për “Starcom” se të afërmit u mblodhën në Kaliforni për t’i qëndruar pranë të ndjerit ditët e fundit. Në disa foto të publikuara nga Page Six, shihet vëllai i vogël i këngëtares, Rajad Fenty, duke mbërritur në qendrën mjekësore, ku ndodhej i ati, në Los Angeles. Besohet se edhe Rihanna ishte në makinë me të në atë moment.
Ronald Fenty ndërroi jetë të shtunën herët në mëngjes, por shkaku zyrtar i vdekjes nuk është bërë ende publik. Rihanna, e cila aktualisht pret fëmijën e saj të tretë me A$AP Rocky, nuk ka bërë ende ndonjë deklaratë publike për ndarjen nga jeta të babait të saj.
Marrëdhënia e komplikuar e këngëtares me të atin
Marrëdhënia midis Rihanna-s dhe të atit ishte e komplikuar gjatë viteve. Ronald kishte probleme me përdorimin e substancave narkotike dhe raporti i tyre ishte i vështirë për shkak të konflikteve. Prindërit e saj u ndanë kur ajo ishte vetëm 14 vjeç.
Megjithatë, në një intervistë me Oprah Winfrey në vitin 2012, ajo tregoi se marrëdhënia mes tyre ishte përmirësuar.
“Ai më mësoi gjithçka, dhe pavarësisht se sa i vështirë ishte për mamanë time, kjo nuk krahasohet me sa i mrekullueshëm ishte si baba,” tha ajo.
Në vitin 2019, Rihanna e paditi të atin, duke e akuzuar se kishte përdorur emrin e saj në mënyrë për të promovuar kompaninë e tij të zhvillimit të talenteve, “Fenty Entertainment”, duke pretenduar në mënyrë të rreme se biznesi kishte lidhje me markën e këngëtares.
Artikuj të sugjeruar:
