Unioni Evropian i Transmetimeve (EBU) ka ngjallur polemika sa i përket Eurovisionit, duke përjashtuar këngëtaren izraelite, Yuval Raphael, nga videoja zyrtare e përmbledhjes së albumit të Eurovision 2025, pavarësisht se kënga përfaqësuese zuri vendin e dytë në renditje.

Ky veprim ka shkaktuar diskutime, pasi shumë njerëz akuzojnë organizatorët për trajtim diskriminues ndaj Izraelit. Nga ana tjetër, njerëz të ndryshëm e kanë “përshëndetur” këtë vendim, duke theksuar se njësoj si Rusia, edhe Izraeli nuk duhet të jetë pjesë e këtij kompeticioni për shkak të luftërave përkatëse.

Performanca e Raphael-it të këngës “New Day Will Rise” grumbulloi 297 pikë nga televotimi i publikut, duke u renditur e para në këtë kategori. Megjithatë, edhe ky vlerësim ka hasur në polemika, pasi ka pasur pretendime për manipulim të rezultatit.

Megjithatë, kur EBU zbuloi videon zyrtare të përmbledhjes së albumit të Eurovision-it të premten, Raphael nuk ishte përfshirë në klipin që paraqiste momentet më të spikatura të performancave.

Një përdorues komentoi:

“Është thellësisht zhgënjyese të shohësh Izraelin, i cili siguroi vendin e dytë në Eurovision këtë vit, të përjashtohet qëllimisht nga ky postim. Kjo bie ndesh me frymën e drejtësisë dhe unitetit që slogani 'Të Bashkuar nga Muzika' pretendon të përfaqësojë.”

Nuk ka ende një reagim zyrtar nga ana e organizatorëve të këtij kompeticioni.

Artikuj të sugjeruar: