Në gjyqin kundër Sean "Diddy" Combs, ish-asistenti i tij personal, David James, ka dhënë dëshmi të detajuara mbi jetën e përditshme të këngëtarit, gjatë periudhës që ka punuar për të, nga viti 2007 deri në 2009.
Përdorimi i substancave dhe pilulave me imazhin e Barack Obama-s
Emri i Barack Obama-s është përfshirë në gjyqin ndaj P. Diddy-t, pasi u përmend nga ish-asistenti i tij, i cili tha se reperi përdorte ekstazi në formën e portretit të ish-presidentit.
David James, i cili punoi për kompaninë “Bad Boy” për dy vite, dëshmoi të martën në sallën e gjyqit dhe i tha trupës gjykuese se kishte parë Diddy-n me një sërë pilulash të ndryshme, përfshirë një me një veçori shumë të veçantë.
Sipas dëshmisë së James, një prej pilulave ekstazi ishte në formën e fytyrës së një presidenti të mëparshëm. Kur prokurorja, Christy Slavik e pyeti drejtpërdrejt se për cilin president bëhej fjalë, ai u përgjigj: “Barack Obama.”
James gjithashtu dëshmoi se përveç pilulave të ekstazisë, Diddy përdorte edhe viagra, pilula për humbje peshe dhe suplemente për rritjen e numrit të spermatozoideve.
Në dëshminë e tij, ai tha gjithashtu se gjatë kohës që punonte për Diddy-n, konsumonte ekstazi dhe vodka, duke e përshkruar këtë si një mënyrë jetese të reperit.
Më herët në proces, agjentët federalë dëshmuan se kishin gjetur ketaminë dhe MDMA në dhomën e hotelit të Diddy-t në New York, pas arrestimit të tij në shtator të vitit 2024. Fotografitë nga kontrolli i bërë në dhomë janë paraqitur tashmë si prova në gjyq.
Sean “Diddy” Combs akuzohet për një sërë veprash të rënda penale, përfshirë abuzim seksual, shantazh, dhunë fizike apo shfrytëzim për prostitucion. Ky proces gjyqësor nisi më 5 maj 2025 dhe është pasojë e një padie të ngritur nga ish-e dashura e tij, këngëtarja Cassie Ventura, e cila e akuzon për një cikël dhune dhe abuzimi që ka zgjatur më shumë se 10 vjet.
Artikuj të sugjeruar:
