Një nga këngët më të përfolura të vitit, nga një prej muzikantëve më me ndikim në botë, nuk është e disponueshme në Spotify, Apple Music ose YouTube, të paktën jo në mënyrë zyrtare/legale. Megjithatë, versione të paautorizuara janë shfaqur dhe zhdukur vazhdimisht.

“Ne e hoqëm përmbajtjen e kësaj kënge nga platofrma dhe do të vazhdojmë ta heqim sa herë të ngarkohet”, tha një zëdhënës i YouTube për NBC News.

Artisti është Kanye West, i njohur gjithashtu si Ye, i cili për më shumë se një çerek shekulli ka tronditur dhe revolucionarizuar botën e muzikës. Kënga, e titulluar “Heil Hitler”, u publikua në maj 2025 dhe përmban vargje dhe imazhe që lavdërojnë ideologjinë naziste. Videoja e saj, e shpërndarë në platformën X (ish-Twitter), përfshin një grup burrash me ngjyrë dhe pa bluzë, të veshur me lëkurë kafshësh, duke bërë përshëndetje naziste nën dritat blu. Kënga përfundon me një fragment të një fjalimi të Adolf Hitlerit nga viti 1935.

Përkundër përpjekjeve për ta hequr nga platformat e transmetimit, kënga ka vazhduar të shpërndahet në internet, duke u ripostuar në forma të ndryshme, përfshirë versione të krijuara nga inteligjenca artificiale. Kjo ka bërë që platformat si Spotify, Apple Music dhe YouTube të përballen me sfida në përpjekjet e tyre për të larguar përmbajtjen.

Ky incident ka ngjallur reagime të forta nga organizata të ndryshme, përfshirë Kongresin Botëror të Hebrenjve, i cili ka kërkuar nga Apple dhe Spotify që të heqin muzikën e West nga platformat e tyre për shkak të përmbajtjes antisemitike.

Teksti dhe videoklipi janë konsideruar gjerësisht si glorifikim i nazizmit, duke ngjallur një sërë reagimesh të forta që e konsiderojnë këngën si provokim ndaj hebrenjve dhe jo vetëm.

A e cenojnë këto polemika lirinë e shprehjes?

Ky akt i West ka shkaktuar një debat të gjerë mbi lirinë e shprehjes, përgjegjësinë e artistëve dhe kufijtë e pranueshmërisë në art. Disa argumentojnë se kënga është një formë e artit provokues që sfidon normat sociale, ndërsa të tjerë e shohin si një akt të rrezikshëm që mund të inkurajojë urrejtjen dhe antisemitizmin.

Në përgjigje të këtij rasti, ekspertët kanë theksuar rëndësinë e edukimit dhe ndërgjegjësimit për të parandaluar përhapjen e ideologjive të dëmshme dhe për të mbrojtur vlerat e respektit dhe dinjitetit njerëzor.

Ky debat është bërë më i përhapur, apo më i vështirë për t’u injoruar, pasi pavarësisht përpjekjeve, kënga ka mundur të përhapet e dëgjohet kudo në botë.

Kritikët e quajnë këngën një sulm të rrezikshëm ndaj etikës publike, ndërsa mbrojtësit e lirisë së shprehjes e përdorin si shembull të tensionit mes artit dhe censurës dhe se si arti është në gjendje të krijojë polemika apo të tregojë përqasjen e një artisti.