Aktori Robert De Niro ka reaguar pas deklaratës së vajzës së tij, Airyn, se është transgjinore. Ai shprehu dashurinë dhe mbështetjen ndaj saj, duke thënë se e do pa asnjë dyshim.

Në një deklaratë për Variety, De Niro tha:

“E doja dhe e mbështesja si djalin tim, dhe tani e dua dhe e mbështes Airyn si vajzën time. Nuk e kuptoj se ku është problem këtu. I dua të gjithë fëmijët e mi.”

Airyn, vajza 29-vjeçare e aktorit të famshëm Robert De Niro dhe aktores Toukie Smith, deklaroi se është transgjinore një ditë më parë, 30 prill. Në një intervistë për revistën “Them”, ajo tregoi për rrugëtimin e saj personal dhe sfidat që ka përjetuar për të gjetur identitetin e saj.

Ajo tha se ndihet se ka qenë prezente, por të tjerët nuk e kanë njohur. Airyn gjithashtu kritikoi mediat që kanë raportuar gabimisht për të dhe theksoi se njerëzit nuk e njohin vërtet jetën e saj. Për ata që e quajnë “fëmijë nepotizmi” për shkak të famës së babait, ajo tha se nuk është rritur me privilegje të tilla dhe se dëshiron që suksesin ta arrijë me forcat e veta.

Në nëntor, Airyn filloi terapinë hormonale dhe shpreson të jetë një frymëzim për njerëzit që janë si ajo – me ngjyrë, queer, transgjinorë etj, të cilët nuk i përshtaten standardeve tradicionale të bukurisë.

Pasi u publikua intervista, vajza e aktorit falënderoi njerëzit për mbështetjen e tyre me një postim në Instagram:

"Faleminderit të gjithëve që keni qenë kaq të mirë dhe mbështetës! Nuk jam mësuar të jem në qendër të vëmendjes.”, shkroi ajo mes të tjerash.

Artikuj të sugjeruar: