Izrael/ Netanyahu thotë se e dinë vetë si do të mbrojnë veten pas sulmit të Iranit

Kryeministri izraelit, Benjamin Netanyahu, u shpreh se Izraeli do i marrë vetë vendimet mbi mënyrën se si do të mbrojë veten, pas sulmit të Iranit, i cili sulmoi me 500 dronë, raketa balistike dhe lundruese.

Reagimi i Netanyahu-t vjen pasi SHBA, BE dhe G7 bënë thirrje për vetëkontroll dhe njoftuan se do t’i shqyrtojnë sansksionet ndaj Iranit dhe mund t’i shtojnë ato. Më 13 prill, Irani bëri një prej sulmeve më të mëdha kundrejt Izraelit. Rreth 500 dronë dhe raketa u lëshuan drejt qiellit izraelit dhe mbrojtja ajrore e shtetit rrëzoi plot 300 raketa e dronë.

Emiratet e Bashkuara Arabe/ 18 viktima në Oman nga reshjet e dendura

Shirat e dendur kanë pushtuar Emiratet e Bashkuara Arabe dhe territorin e Omanit, duke përmbytur kështu autostrada, aeroporte, rrugë e qendra tregtare. Përmbytjet kanë shkaktuar edhe 18 viktima në Oman dhe ndërprerje të udhëtimeve në Emiratet e Bashkuara Arabe.

Të martën, si pasojë e reshjeve, në Oman, u përmbyt një automjet shkollor me 9 nxënës dhe me shoferin e automjetit. 8 viktima të tjera u regjistruan. Banorëve iu kërkua të evakuoheshin në strehimore nëse mendonin se ishin në rrezik ose u kërkohej autoriteteve që t’i shpëtonin.

Lufta në Gaza/ OKB kërkon 2.8 miliardë dollarë për ndihmën ndaj palestinezëve

Kombet e Bashkuara kanë bërë thirrje për 2.8 miliardë dollarë, në mënyrë që të ofrohet ndihma e nevojshme për 3 milionë palestinezë, të cilët janë duke vuajtur pasojat e tmerrshme të luftës që nisi qysh prej tetorit 2023. Luftimi i urisë në Gazën e shkatërruar nga lufta është primar, por edhe ndërtimi i kanalizimeve dhe impianteve të ujit, si dhe i godinave shëndetësore është mjaft i rëndësishëm.

Andrea De Domenico, kreu i Zyrës humanitare të OKB-së për Gazën dhe Bregun Perëndimor, u shpreh se kërkohen operacione të mëdha, që këto shërbime të rikthehen sërish dhe të krijojnë të paktën kushte minimale. Ai tha se në Gazë janë shkatërruar spitale, sisteme të ujësjellësit e kanalizimeve, shtëpi, rrugë e shkolla.

Ukrainë/ Rrëzohen 9 dronë rusë

Sistemet kundërajrore të Ukrainës kanë arritur të rrëzojnë 9 dronët rusë që kërcënonin Kievin. Dronët u nisën në drejtim të Ukrainës në mëngjesin e së martës dhe u shkatërrohen në rajonet e ndryshme: Herson, Mikolaiv, Hmelnitski, Poltava, Çerkasi dhe Dnipropetrovsk.

Rusia i ka rritur ndjeshëm sulmet ndaj Ukrainës, e cila po përballet me një krizë në mungesën e municioneve dhe mbrojtjeve ajrore. Kjo ndihmë është shumë e nevojshme, pasi vetëm kështu ushtria ukrainase mund t’u bëjë ballë sulmeve ruse. Ndërkohë që Ukraina po kërkon më shumë ndihmë nga SHBA, paketa e ndihmës po shqyrtohet prej kohësh në Dhomën e Përfaqësuesve, për shkak të kundërshtimeve që bëjnë republikanët.