Majat e djegura janë për flokët ajo që aknet janë për lëkurën - një shqetësim estetik i bezdisshëm. Në treg mund të gjesh pafund produkte që premtojnë t’i “mbyllin” këto maja të dëmtuara, por a është vërtet e mundur apo thjesht një taktikë marketingu? Ekspertët e flokëve kanë dhënë përgjigjet e tyre.
Çfarë janë majat e djegura?
Nëse i sheh me vëmendje majat e flokëve dhe vëren se janë çarë në dy ose më shumë pjesë, atëherë ke të bësh me maja të djegura. Këto ndodhin kur shtresa mbrojtëse e jashtme e flokut dëmtohet. Pa këtë shtresë mbrojtëse, korteksi i brendshëm ekspozohet dhe flokët dobësohen, duke u çarë në majë.
Ekzistojnë disa lloje të ndryshme të majave të djegura:
• Çarja bazike – kur floku ndahet në formën e një “Y”.
• Çarja në formë pende – kur ka disa çarje përgjatë një fijeje, një shenjë e dëmtimit të madh të kutikulës.
• Çarja në formë peme – kur nga një pikë e vetme dalin disa çarje të vogla, zakonisht nga tharja e tepërt.
• Çarja e nyjëzuar – kur një fije floku formon një nyjë të vogël, gjë që ndodh më shpesh te flokët kaçurrela ose me teksturë.
Çfarë i shkakton majat e djegura?
Shumë faktorë mund të ndikojnë në dëmtimin e shtresës së jashtme të flokut. Një nga fajtorët kryesorë është përdorimi i shpeshtë i nxehtësisë nga pjastrat, tharëset dhe mashat, të cilat jo vetëm që e dobësojnë flokun, por edhe i heqin lagështinë natyrale, duke e bërë të thatë dhe të brishtë.
A mund të “mbyllen” majat e djegura?
Përgjigja e shkurtër: Jo. Majat e djegura janë çarje të fijeve të flokut. Kur ndodh dëmtimi i brendshëm i fijeve të flokut, asnjë produkt nuk mund ta mbyllë atë. Pra, i vetmi trajtim real është një prerje e flokëve. Ekspertët rekomandojnë një prerje çdo 8-12 javë për të parandaluar dëmtimin, ndërsa për ata që përdorin shpesh nxehtësi ose trajtime kimike, një prerje çdo 6-8 javë është më e mira.
Lajmi i mirë është se, edhe pse asnjë produkt nuk mund t’i “ngjitë” majat e ndara, ka disa produkte që ndihmojnë në minimizimin e pamjes së tyre, duke i bërë flokët të duken më të butë dhe më të shëndetshëm. Megjithatë, nëse dëshiron flokë të bukur dhe pa maja të djegura, duhet të kapësh gërshërët!
Burime: HuffPost
