Mbretëria e Bashkuar/ Një djalë gjendet e gozhduar në një gardh

Një ngjarje tronditëse ka ndodhur në Mbretërinë e Bashkuar, ku në një park makinash në Bushmills, County Antrim, është gjendur një djalë rreth 20 vjeç, i gozhduar. Në secilën dorë, ai kishte nga një gozhdë. Ai u gjet pak pas mesnate dhe sipas policisë së Irlandës së Veriut, lëndimet që mori mund t’i ndryshonin jetën, por jo ta rrezikonin atë.

Edhe dy furgona, një prej të cilëve ishte i djalit, u gjendën të djegur në një parking aty afër. “Ky ishte një sulm i keq. Ne jetojmë në një shoqëri demokratike ku nuk ka asnjë justifikim për këtë. Ata që janë përgjegjës brutalizojnë komunitetet e tyre dhe kontrollojnë të tjerët përmes frikësimit dhe dhunës”, thanë autoritetet.

Rusi/ Zelensky, në listën e njerëzve të kërkuar nga autoritetet ruse

Rusia ka vendosur emrin e presidentit të Ukrainës, Volodymyr Zelensky, në listën e njerëzve të kërkuar. Lista u publikua nga Ministria e Brendshme e Rusisë. Mbi Zelensky-n rëndojnë disa akuza penale, të cilat nuk janë bërë publike.

Në këtë listë bën pjesë edhe ish-presidenti i Ukrainës, Petro Poroshenko. Edhe më parë, Rusia ka futur në listën e saj të kërkimit emra të zytrarëve dhe politikanëve ukrainas, duke i cilësuar si persona të akuzuar për vepra penale.

Jerusalem/ Izraeli bastis zyrën e “Al Jazeera”

Policia e Izraelit ka bastisur zyrën e medias “Al Jazeera” në Jerusalem, duke cenuar kështu të drejtën e medias për raportimin e situatës në vend. Oficerët, të veshur me veshje civile, çmontuan pajisjet e përdorura nga gazetarët, të cilët punonin në një dhimë hoteli.

Hoteli, i ndodhur në Jerusalemin lindor, shërbente si një zyrë. Disa kohë më parë, qeveria e Izraelit votoi për mbylljen e zyrës së medias, në pronësi të Katarit dhe u ndërpre transmetimi satelitor dhe kabllor i kanalit.

Gaza/ Izraeli, gati të sulmojë Rafahun

Ajo që shumë vende dhe vetë palestinezët i druheshin, ndodhi! Izraeli lajmëroi palestinezët në Gaza që të evakuuohen sërish dhe po përgatitet për një sulm në Rafah, pasi tre ushtarë izraelitë gjetën vdekjen nga një sulm me raketa të kryer nga Hamasi.

Ushtria izraelite tha gjatë ditës së sotme (6 maj 2024) se do të urdhëronte palestinezët të evakuuoheshin. Kjo thirrje vjen pasi Hamasi dhe Izraeli, u takuan në Kajro dhe dakordësuan në disa pika për armëpushimin e tyre. Megjithatë, Hamasi synoi të sulmonte një bazë ushtarake izraelite, çka me shumë gjasa do të sjellë edhe sulmin në Rafah.