Trump do të bisedojë me Putinin për të ndalur luftën në Ukrainë
Presidenti i SHBA, Donald Trump, bëri të ditur se të hënën do të zhvillojë një telefonatë me presidentin rus, Vladimir Putin, për të diskutuar mbi luftën në Ukrainë.
Sipas Trump, tema kryesore e bisedës do të jetë “ndalimi i gjakderdhjes”. Pas kësaj telefonate, ai tha se planifikon të flasë edhe me presidentin ukrainas, Volodymyr Zelensky, si dhe me “disa anëtarë të NATO-s”.
Ai shtoi se shpreson që këto bisedime të çojnë në një armëpushim mes Ukrainës dhe Rusisë. Përfundimi i luftës ishte një nga premtimet kryesore të fushatës së tij presidenciale.
Austria fiton Eurovision 2025 me këngën “Wasted Love”
Austria ka fituar Festivalin Europian të Këngës – "Eurovision 2025", me këngën “Wasted Love”, të këngëtarit 24-vjeçar JJ (Johannes Pietsch).
Fituesi u shpall mes emocionesh të mëdha, pasi deri në momentet e fundit në krye ishte Izraeli, i cili përfundoi në vendin e dytë, ndjekur nga Estonia.
Kjo është hera e tretë që Austria fiton Eurovision-in, pas sukseseve të mëparshme në vitet 1966 dhe 2014. Austria gjithashtu mban rekordin për hendekun më të gjatë mes dy fitoreve – plot 48 vjet.
Samiti i Ligës Arabe në Bagdad: Thirrje për armëpushim në Gaza dhe rindërtim
Udhëheqësit arabë u mblodhën të shtunën në Bagdad për Samitin vjetor të Ligës Arabe, ku njoftuan se po punojnë për një armëpushim mes Izraelit dhe Hamasit në Rripin e Gazës dhe u angazhuan për të ndihmuar në rindërtimin e zonës.
Kryeministri spanjoll, Pedro Sánchez ishte i ftuar nderi, së bashku me Sekretarin e Përgjithshëm të OKB-së, António Guterres.
Sánchez, i cili të mërkurën në një fjalim në parlamentin spanjoll e quajti Izraelin “një shtet gjenocidal”, i bëri thirrje bashkësisë ndërkombëtare që të ushtrojë presion mbi Izraelin “për të ndalur masakrën në Gaza”.
Moti i keq në SHBA: Të paktën 21 viktima nga stuhitë
Moti i ashpër ka përfshirë SHBA-në, duke lënë të paktën 21 të vdekur. Zyrtarët paralajmërojnë se numri i viktimave mund të rritet.
Në Kentucky janë konfirmuar të paktën 14 të vdekur. Autoritetet lokale thanë se nëntë prej tyre humbën jetën pasi një tornado e fuqishme goditi pjesën juglindore të shtetit.
Dëmet janë të shumta: ndërtesa të shembura dhe makina të përmbysura në autostradë. Zyrtarët raportojnë gjithashtu për dhjetëra të plagosur rëndë.
