Zelensky i kërkon G7-s të izolojë plotësisht Rusinë

Kreu i Ukrainës, Volodymyr Zelensky, ka mbajtur fjalim në samitin e 7 shteteve më të industrializuara (G7), dhe u ka bërë thirrje liderëve botërorë që të bllokojnë sektorin rus të energjisë me sanksione tjera, për t’ia bërë të pamundur përfitimet financiare. 

Ai i ka bërë këto deklarata dy ditë pas sulmeve ajrore vdekjeprurëse të Rusisë nëpër qytetet ukrainase.

Si pasojë e tyre humbën jetën të paktën 19 persona dhe qindra qyteza e fshatra kanë mbetur pa rrymë elektrike.

Në pjesëmarrjen virtuale, Zelensky ka thënë se duhet të vendoset “një çmim tavan” për të eksportet e naftës dhe gazit nga Rusia.

Çmimi tavan është çmimi maksimal i lejuar ligjërisht në një shtet.

“Rusia duhet të izolohet plotësisht dhe të ndëshkohet. Të ndëshkohet si në aspektin politik, ashtu edhe përmes sanksioneve. Hapa të tillë e bëjnë paqen më të afërt – inkurajojnë shtetin terrorist që të mendojë për paqen, për dëmet e luftës”, u ka thënë Zelensky liderëve të Shteteve të Bashkuara, Kanadasë, Gjermanisë, Britanisë, Japonisë, Francës dhe Italisë.

Kurorëzimi i mbretit Charles do të bëhet vitin e ardhshëm

Kurorëzimi i mbretit Charles do të bëhet në 6 maj të vitit të ardhshëm në Westminster Abbey në Londër, njoftoi të martën Pallati Buckingham.

Shërbimi do të jetë më modern se kurorëzimi i mëparshëm mbretëror dhe “do të shohë drejt së ardhmes”. Të paktën kështu njoftoi pallati mbretëror duke shtuar  se ceremonia do të jetë padyshim e mbështetur në traditat e vjetra.

Kryepeshkopi i Canterbury Justin Welby do të drejtojë ceremoninë, e cila do të shohë Charles-in e 3-të të kurorëzuar së bashku me gruan e tij Camilla, bashkëshortja mbretëreshë.

73-vjeçari u bë mbret i Britanisë muajin e kaluar pas vdekjes së nënës së tij, Mbretëreshës Elizabeth II.

Kurorëzimi i tij është planifikuar për vitin e ardhshëm për të lejuar një periudhë të përshtatshme kohore për të mbajtur zi për sovranen e mëparshëm dhe për të planifikuar ceremoninë.

NASA ndryshon drejtimin e asteroidit Dimorphos

Agjencia amerikane e Hapësirës, NASA, ka thënë se tentimi i saj për të devijuar rrugën e një asteroidi, ka rezultuar i suksesshëm.

Shkencëtarët kanë konfirmuar se shkëmbit hapësinor, 160 metra të gjerë, të njohur si Dimorphos, i është devijuar rruga kur është goditur nga sonda Dart muajin e kaluar.

Ata kanë ardhur në këtë përfundim pasi kanë kryer matje të shumta në Hapësirë me ndihmën e teleskopëve në Tokë. Ky mision është kryer për të testuar strategjinë potenciale për të mbrojtur planetin Tokë nga objektet që e kërcënojnë atë.

Sonda Dart ka dëshmuar se një plan i tillë mund të funksionojë, nëse realizohet në kohë dhe nëse shënjestra nuk është jashtëzakonisht e madhe.

“Misioni tregon që NASA është duke tentuar që të jetë e përgatitur për çfarëdo objekti që e nis Universi drejt nesh”, ka thënë administratori i NASA-s, Bill Nelson.

“Besoj se NASA e ka dëshmuar se është mbrojtëse serioze e planetit”, u ka thënë ai gazetarëve.

Eksperimenti ka ndodhur rreth 11 milionë kilometra larg Tokës.

Sipas Putin, Rusia është e hapur për të diskutuar rreth centralit në Zaporizhia

Presidenti rus, Vladimir Putin është shprehur për shefin e Agjencisë Ndërkombëtare për Energji Atomike, Rafael Grossi, se ai është i hapur për dialog rreth centralit bërthamor në Zaporizhia.

Gjatë një takimi në Shën Petersburg, Putin u shpreh se situata rreth centralit është shqetësuese.

Sipas shefit të Kremlinit, ka pasur politizim të tepruar dhe të rrezikshëm të gjithçkaje që kishte të bënte me aktivitetin bërthamor.

Ndërsa, Grossi do të takohet edhe me presidentin ukrainas, Volodymyr Zelensky në Kiev, më vonë gjatë kësaj jave, për të diskutuar rreth centralit.

Termocentrali bërthamor i Zaporizhzhia, më i madhi në Evropë, ka qenë një pikë kyçe në operacionin ushtarak të Rusisë në Ukrainë.