OKB thotë se dyshohet se Hamasi ka kryer dhunë seksuale në sulmin e 7 tetorit në Izrael
Një prej ekipeve të OKB-së dorëzoi të hënën një raport, ku thuhej se ka “arsye të forta dhe bindëse” për të besuar se Hamasi ka kryer sulme seksuale në sulmin e 7 tetorit, në vendndodhje të ndryshme në Izrael. Në raport thuhet se dhuna seksuale përkon edhe me përdhunim në grup.
OKB vizitoi Izraelin dhe grumbulloi, analizoi dhe verifikoi të dhënat për dhunë seksuale, që nga 29 janari 2023 deri më 14 shkurt 2024.
“Janë mbledhur gjithashtu edhe të dhëna të hollësishme dhe të besueshme, të cilat mund të jenë tregues i disa formave të dhunës seksuale, përfshirë gjymtimin gjenital, torturën e seksualizuar, apo trajtimin mizor, çnjerëzor dhe përçmues”, shkruhet ndër të tjera në këtë raport, ndërkohë që Hamasi i ka mohuar gjithnjë akuzat për dhunë seksuale.
Portugali/ Sekuestrohet 1.3 tonë kokainë e fshehur brenda peshqve të ngrirë
Policia e Portugalisë ka zbuluar një prej sasive më të mëdha të kokainës gjatë viteve të fundit. Plot 1.3 tonë kokainë ka qenë e fshehur brenda peshqve të ngrirë. Në këtë operacion u arrestuan 7 persona, të cilët kishin edhe 8 armë zjarri dhe makina luksoze.
Ngarkesa erdhi nga Ekuadori dhe u shkarkua në portin e Lisbonës. Operacioni ishte shumë i vështirë dhe lënda narkotike u gjet në trupat e peshqve të ngrirë, të cilët ishin vendosur në disa kuti kartoni.
Haiti/ Shpallet gjendja e jashtëzakonshme, pasi bandat sulmojnë burgun
Qeveria e Haitit është detyruar të shpallë gjendjen e jashtëzakonshme, pasi bandat e armatosura sulmuan një prej burgjeve më të mëdha, duke vrarë 12 persona dhe ndihmuar në arratisjen e 4,000 të burgosurve.
Ndër të arratisurit ishin edhe anëtarë të bandave, të cilët janë akuzuar për vrasjen e presidentit në vitin 2021. Drejtuesit e bandave thonë se përmes këtyre sulmeve, duan ta bëjnë kryeministrin (i cili nuk ndodhet në Haiti momentalisht) që të dorëhiqet, ndërsa janë duke kontrolluar rreth 80% të kryeqytetit.
DASH thotë se SHBA do të vijojë të mbështesë Izraelin
Zëdhënësi i Departamentit të Shtetit, Matthew Miller, është shprehur se SHBA do të vijojë të mbështesë ushtarakisht Izralin, pavarësisht se qeveria izraelite ka refuzuar të hapë më shumë kalime për dërgimin e ndihmës në Gaza.
“Ne vazhdojmë të mbështesim fushatën e Izraelit për të siguruar që sulmet e 7 tetorit të mos përsëriten. Ne i kemi ofruar ndihmë ushtarake Izraelit sepse është në përputhje me këtë qëllim”, tha Miller në një konferencë, duke shtuar se Hamasi, i cili planifikoi dhe kreu sulmin e 7 tetorit vijon të jetë e i lirë brenda territorit të Gazës, duke u bërë kështu kërcënim për civilët e pafajshëm në Izrael.
