Gaza/ Hamasi thotë se 3 pengje izraelite janë vrarë nga sulmet ajrore

Hamasi është shprehur se ushtria izraelite ka vrarë 3 nga pengjet që u rrëmbyen pranë Tel Avivit, më 7 tetor 2023. Sipas Hamasit, një nga viktimat kishte nënshtetësi amerikane. Vrasja e tyre ndodhi gjatë operacionit special të shpëtimit të katër pengjeve të tjerë.

Grupi militant tha në Telegram: “Ju informojmë ushtria juaj vrau tre të burgosur në të njëjtin kamp, njëri prej të cilëve ka nënshtetësi amerikane”. Së bashku me këtë informacion, ata publikuan edhe një video, në të cilën paralajmëruan se pengjet e tjerë nuk do të lirohen derisa të ndodhë shkëmbimi me të burgosurit palestinezë që mbahen në Izrael.

Joe Biden thotë se Rusia nuk do ndalet vetëm në Ukrainë

Sipas presidentit amerikan, Joe Biden, presidenti Vladimir Putin nuk e ka në plan të ndalet veç në Ukrainë, duke paralajmëruar se e gjithë Europa është nën kërcënim. Presidenti e bëri deklaratën pas një takimi me Emmanuel Macron, në Paris.

Biden shtoi se SHBA nuk do ta lejojë që Putin të sulmojë Europën dhe të vijojë përparimin në Ukrainë: “SHBA po e mbështet Ukrainën. E përsëris që nuk do e braktisim”, u shpreh ai, ndërsa Macron e falenderoi për qëndrimet.

OKB kërkon lirimin e 11 zyrtarëve të saj, të burgosur në Jemen

Nëntë burra dhe dy gra, zyrtarë që punojnë në agjenci të ndryshme të OKB dhe bashkëshortja e njërit prej punonjësve janë burgosur nga rebelët Houthi në Jemen, gjatë tre ditëve të fundit. “Organizata e Kombeve të Bashkuara kërkon lirimin e menjëhershëm dhe të pakushtëzuar të tyre,” thotë një zëdhënës i OKB, Stefan Diyarik.

Ai shtoi se OKB është shumë e shqetësuar për arrestimin e punonjësve të stafit të saj, sidomos për shkak se rebelët nuk kanë dhënë asnjë arsye për arrestimin. Personat e arrestuar punojnë në agjenci të ndryshme si: Agjencia për të Drejtat e Njeriut; Programi i Zhvillimit dhe Programi Botëror i Ushqimit. Një tjetër i burgosur punon në zyrën e të Dërguarit të Posaçëm.

SHBA/ Protestuesit pro-palestinezë rrethojnë Shtëpinë e Bardhë

Protestuesit pro-palestinezës u mblodhën sërish, këtë herë pranë Shtëpisë së Bardhë, duke kërkuar që t’i jepet fund luftës në Gaza dhe që SHBA të mos e mbështesë më Izraelin në shkatërrimin e Rripit të Gazës dhe vrasjen e civilëve të pafajshëm. Ndërkohë, në Shtëpinë e Bardhë u shtuan masat e sigurisë.

Protestat tanimë kanë vijuar prej muajsh në SHBA, sidomos për mbështetjen që superfuqia po i jep Izraelit, me të cilin ka një marrëdhënie të rëndësishme diplomatike. Grumbullime të shumta demonstruesish kanë ndodhur rreth e rrotull Shtëpisë së Bardhë, janë bërë marshime, janë bllokuar ura, trena dhe aeroporte. Edhe studentët kanë protestuar, duke ngritur tenda në universitetet përkatëse. Protesta janë bërë edhe në kabinetin e Biden, pasi 8 zyrtarë kanë dhënë dorëheqjen, pasi janë kundër politikave të presidentit.