Protesta masive në Turqi: Kreu i Bashkisë së Stambollit lihet në burg
Katër ditë pas arrestimit, kryetari i bashkisë së Stambollit, Ekrem Imamoglu, u dërgua në gjykatë, ku u la në burg.
Imamoglu u ndalua pas një bastisjeje në shtëpinë e tij këtë javë, duke shkaktuar valën më të madhe të demonstratave në Turqi në më shumë se një dekadë.
Burgosja e tij shikohet gjerësisht si një lëvizje politike për të eliminuar një kundërshtar të mundshëm nga gara për presidentin në vitin 2028.
Protesta në Amsterdam kundër fashizmit dhe të djathtës ekstreme në Europë
Më shumë se 10,000 njerëz u mblodhën në sheshin Dam në kryeqytetin holandez, Amsterdam, për të marrë pjesë në një protestë masive kundër racizmit, fashizmit dhe politikave të së djathtës ekstreme të shtunën.
Demonstrata – e organizuar nga Comité 21 Maart – një shoqatë kundër racizmit – erdhi një ditë pas Ditës Ndërkombëtare për Eliminimin e Diskriminimit Racor, e cila përkujtohet çdo vit më 21 mars që nga shpallja e saj e vitit 1966 nga Kombet e Bashkuara.
Protestuesit mbanin pankarta ku shkruhej "Kurrë më", ndërsa bënin thirrje kundër rritjes së së djathtës ekstreme në të gjithë Europën, duke rikujtuar fillimin e shekullit të 20-të kur fashizmi u përhap gjerësisht.
Sulmet me dron rus në kryeqytetin e Ukrainës vrasin të paktën tre persona
Të paktën tre persona u vranë, duke përfshirë një fëmijë pesëvjeçar, pasi Rusia nisi një breshëri dronësh që synonin Kievin gjatë natës të së dielës, thanë zyrtarët lokalë.
Sulmi në kryeqytetin e Ukrainës erdhi përpara negociatave të armëpushimit në Arabinë Saudite, në të cilat Ukraina dhe Rusia pritet të zhvillojnë bisedime indirekte të ndërmjetësuara nga SHBA.
Rusia lëshoi 147 dronë në të gjithë Ukrainën, sipas Forcave Ajrore të Ukrainës. Mbrojtja ajrore ukrainase rrëzoi 97 dhe 25 të tjerë nuk arritën objektivat për shkak të mbrojtjes ukrainase. Sulmet goditën gjithashtu rajonet Kharkiv, Sumy, Chernihiv, Odesa dhe Donetsk.
Papa Françesku del sot, 23 mars, nga spitali
Papa Francesku pritet të lërë spitalin Gemelli dhe të kthehet në rezidencën e tij në Santa Marta, pas 38 ditëve shtrim për shkak të pneumonisë bilaterale dhe infeksionit respirator polimikrobik. Megjithatë, ai do duhet që për të paktën dy muaj të mos sforcohet, pasi është ende në fazë rikuperimi.
Gjatë javës së fundit gjëndja e tij shëndetësore është përmirësuar por dhe vetë Papa ka kërkuar të kthehet sa më shpejt në Vatikan. Pavarësisht se ka qenë i tërhequr nga daljet publike, ai ka shaqur dëshirën për të qenë pranë besimtarëve në këtë periudhë të rëndësishme të Pashkëve, momenti më i shenjtë për të krishterët.
