Covid: Qeveritë europiane duhet urgjentisht të rrisin monitorimin, thotë OBSH
Organizata Botërore e Shëndetësisë u ka bërë thirrje qeverive europiane që urgjentisht të përforcojnë në vend që të zvogëlojnë monitorimin e Covid-19, duke paralajmëruar për një dimër potencialisht të vështirë pasi një valë e re infeksionesh po përfshin kontinentin.
Hans Kluge, drejtori rajonal i OBSH-së për Europën, tha se ishte "shumë e qartë" se rajoni u përball me një rritje të nxitur nga variantet shumë të transmetueshme të Omicron BA.2 dhe BA.5. Kluge tha se rastet e reja ishin trefishuar gjatë gjashtë javëve të fundit, me afër 3 milionë infeksione të reja të konfirmuara javën e kaluar. Pothuajse gjysma e të gjitha rasteve të reja në mbarë botën janë në Europë, tha ai, ku edhe pranimet në spital për shkak të virusit janë dyfishuar.
Kriza në Sri Lanka: Parlamenti zgjedh presidentin e ri
Parlamenti i Sri Lankës do të zgjedhë mes tre kandidatëve për president të mërkurën, duke shpresuar se lideri i ri do të jetë në gjendje të nxjerrë ishullin nga kriza më e keqe ekonomike dhe politike që nga pavarësia në vitin 1948.
Një fitore për presidentin në detyrë, Ranil Wickremesinghe - një nga dy pretendentët kryesorë, por i kundërshtuar nga qytetarët - mund të çojë në më shumë demonstrata nga njerëzit e tërbuar me elitën në pushtet pas muajve të tëra mungesash në karburant, ushqim dhe ilaçe.
Ligjvënësi i partisë në pushtet Dullas Alahapperuma, një ish-gazetar, është më i pranueshëm për protestuesit dhe opozitën, por nuk ka ndonjë përvojë të qeverisjes së nivelit të lartë në një vend me pothuajse asnjë dollarë për importe.
Biden nën presion për të shpallur emergjencën klimatike
Joe Biden është nën presion për të shpallur një emergjencë kombëtare klimatike pasi temperaturat rriten në të gjithë SHBA-në dhe Europën. Biden është përpjekur t'u sinjalizojë votuesve se po merret me ngrohjen globale në një kohë kur disa mbështetës janë zhgënjyer për mungesën e progresit.
Aktivistët kanë paralajmëruar se po ikën koha he SHBA-ja duhet të ulë emetimet dhe të inkurajojë vendet e tjera të bëjnë të njëjtën gjë. Shkencëtarët thonë se mosveprimi do të çojë në ndikime "të pakthyeshme" si valët e të nxehtit, përmbytjet, zjarret dhe një trazirë masive të njerëzve të zhvendosur.
Putin mbështetet nga Irani për pushtimin e Ukrainës, por përplaset me Turqinë në samit
Vladimir Putin përfundoi samitin e tij të parë të madh jashtë Rusisë që nga pushtimi i Ukrainës me një miratim nga Irani për përgjigjen e tij ndaj NATO-s, një përplasje me Turqinë për Sirinë dhe shenja përparimi mbi heqjen e bllokadës të grurit ukrainas.
Shtëpia e Bardhë tha se samiti i Teheranit i mbajtur midis Putinit, presidentit iranian, Ebrahim Raisi dhe presidentit turk, Rexhep Tajip Erdogan, tregoi se sa i izoluar ishte bërë lideri rus. Takimi i Putinit me Erdoganin ishte takimi i tij i parë me një kryetar qeverie të një anëtari të NATO-s dhe udhëtimi i tij në Teheran ishte i dyti jashtë Rusisë që nga pushtimi i Ukrainës.
Erdogan ka udhëhequr përpjekjet për të ndërmjetësuar një marrëveshje sipas së cilës gruri mund të largohet nga portet për sa kohë që anijet inspektohen në mënyrë të pavarur për armatim. Më shumë se 25 milionë ton drithë që nevojiten urgjentisht në Afrikë dhe Lindjen e Mesme aktualisht po mbahen në kapanone.
Alexandria Ocasio-Cortez dhe kolegët e Dhomës së Përfaqësuesve u arrestuan gjatë protestës pro-zgjedhjes
Disa anëtarë të njohur demokratë të Kongresit u arrestuan të mërkurën gjatë një proteste në mbështetje të të drejtave të abortit përpara gjykatës supreme. Politikanët u mblodhën përpara Capitol-it të SHBA përpara se të marshonin drejt ndërtesës së gjykatës, duke brohoritur "trupat tanë, zgjedhja jonë".
Kanë kaluar më pak se një muaj që kur Gjykata e Lartë rrëzoi vendimin historik të vitit 1973 Roe vs Wade, i cili mbronte të drejtën për abort sipas kushtetutës. Aborti tani është i ndaluar ose rrezikon të ndalohet në 60% të shteteve.
'Zjarri i Ferrit': Dita më e nxehtë e regjistruar në Britaninë e Madhe
Temperatura më e nxehtë e regjistruar ndonjëherë në Britani ishte titulli kryesor i faqeve të para të gazetave në një ditë kur vala e të nxehtit shkaktoi zjarre, njerëzit u nxitën të kursenin ujin dhe ekspertët paralajmëruan se mund të presim më shumë nxehtësi ekstreme në vitet në vijim.
Titulli i "Mirror" thotë "Britania 40 gradë Celsius po digjet"; The Sun thjesht thotë "Zjarri i ferrit”; Në The Guardian shkruhet 'Një thirrje zgjimi': Mbretëria e Bashkuar arrin temperaturën më të lartë ndonjëherë", me një paralajmërim nga shkencëtarët se nevojitet veprim urgjent për të zbutur ndikimin e ndryshimeve klimatike.
