Indonezi/ Llava e vullkanit shkakton 37 viktima

37 njerëz mbetën të vdekur nga llava që rrodhi nga një vullkan që goditi ishullin perëndimor të Sumatra, në Indonezi. Pas orëve të tëra shtrëngatash, vullkani aktiv në malin Marapi nxori llavë të ftohtë – përbëhet nga materiali vullkanik dhe guralecat që rrjedhin poshtë shpateve të një vullkani në shi - dhe përmbyti 2 lagje, duke shkatërruar banesa, xhami dhe objekte publike.

Autoritetet shprehen se numri i viktimave mund të jetë në rritje dhe deri më tani, janë zhdukur 18 njerëz. Llava përshkoi shtëpitë e njerëzve dhe sipas banorëve, edhe shkëmbinj të mëdhenj u shkëputën nga mali.

New York/ Sulmohet aktori Steve Buscemi

Aktori i famshëm Steve Buscemi është sulmuar nga një burrë, ndërsa bënte një shëtitje nëpër rrugët e New York. Ai ishte duke ecur në Manhatanin lindor, kur një burrë shkoi dhe e goditi me grusht. Autori ende nuk është kapur dhe nuk dihet arsyeja e këtij sulmi krejt të rastësishëm.

Ndërkohë, Buscemi u dërgua në spital, ku mori trajtim për goditjen në sy. Policia publikoi kudo imazhin e burrit që dyshohet se mund ta ketë sulmuar Steve, i cili është në kërkim nga autoritetet.

Rusia është gati të përballet me Perëndimin

Sipas ministrit të Jashtëm rus, Sergei Lavrov, Rusia është e përgatitur për një përballje luftarake me Perëndimin, nëse ai dëshiron të luftojë për Ukrainën. Sergei u shpreh se është e drejta e Perëndimit që të përballet në fushëbetejë, ndaj Rusia është e gatshme.

Këto deklarata vijnë pasi Kremlini ka thënë pak a shumë të njëjtën gjë më parë. Rusia ka dënuar dërgimin e trupave të NATO-s në Ukrainë, të cilët do të luftojnë krah trupave ukrainas kundër atyre ruse. Rusia e cilësoi aktn shumë të rrezikshëm dhe ka shtuar paralajmërimet për një përballje direkte me NATO-n.

Blinken ashpërson tonet ndaj Izraelit, për pushtimin e Rafah

Antony Blinken, Sekretari Amerikan i Shtetit, ka bërë një deklaratë me tone të vrazhda kundrejt Izraelit, pas ofensivës që ka ndërmarrë në Rafah, zona e vetme e pashkatërruar në Gaza. Blinken u shpreh se metodat e Izraelit kanë shkaktuar një humbje të tmerrshme të jetëve civile të pafajshëm, por ende nuk kanë mundur të bëjnë neutralizimin e Hamasit dhe kjo mund të çojë edhe në një kryengritje.

Blinken u shpreh se SHBA mendon se Netanyahu duhet të largohet nga Gaza dhe pret të shohë plane konkrete dhe të besueshme nga qeveria izraelite, për sigurinë e këtij territori, pas përfundimit të luftës. Ai shtoi se Hamasi është shfaqur disa herë në Gaza dhe theksoi se një veprim i ashpër nga forcat izraelite në Rafah do të rrezikonte marrëdhëniet e SHBA në Lindjen e Mesme.